Пасхин әрүн байриг цуг чонжст темдглв
Православн шажнд шүттг улс Иисус Христосин Воскресения хамгин һол байр — Пасхин байр темдглв. Танһчин цуг чонжд бембә өдрин сөөһәр нарн өдрин сө күртл байрин ик мөргүл болв. Ик мацг бәрснә хөөн христианмуд байн ширә белдәд, тогтсн авьясар чонжд әрүслгдсн ширәр будсн өндг, пироги, пасх элвгәр тәвцхәв.
Сөөһин өрәл өөрдәд ирж йовсн цагт цуг православн чонжст байрин мөргүлмүд эклв. Эн сө өдрәс сарул болдж медгдв. Мөргүлин нернь полуношница. Мөргүлин йовудт Шин Заветын дегтрин негнәснь — Апостолмудын әрүн үүлдврин тускар маань умшгдна. Энүнд әрүн апостолмудын күч-көлсәр болн умшсн мааняр христианск иткл цуг нарта-делкәд тархагдсмн. Элст балһснд Казанск кафедральн чонжд байрин ик мөргүлиг епископ Зиновий һардв.
Эн өдр чонжд олн әмтн цуглрв. Нааран ирсн улс әрүн мөргүлд орлцад, ик байр тосв. Энд болсн мөргүлд күндтә гиичнр танһчин толһач Алексей Орлов болн танһчин правительствин ахлач Игорь Зотов орлцв. Орловин темдглсәр, Пасхин әрүн байр хамг мууһас гетлж, цуг улсиг негдүлжәх байр болжана.
Танһчин толһач Алексей Орловин келсәр, эндр әрүн Пасхин байрла цуг улсиг йөрәжәнә. Пасхин байр әрүн ик чинрт цуг нарта-делкәд босхмж авч ирнә. Мосвкан болн цугәрәсән патриарх Кирлиилын келсн үг давтад келхлә, Христос бурхн цуг әмтнд туслж, энүнд сүзглдг улст тусан күргж чадна. Энүгәрн праваславн шажн талдан шажнла әдл болжана. Нег үлү олн келн-улс бәәх Әрәәсд эннь ик ичнр зүүжәнә.
Пасхин сөөһәс авн иргч дөчн өдр христосовать кедг авьяс бәәнә. Цуг әмтн нег —негән Христос воскрес гидг үгмүдәр күндлж мендлнә. Иим үгмүдин хөөн һурв дәкж теврәд нег —негән үмсх кергтә. Иим кевәр православн шажнд шүттг улс оюни байран медүлнә. Пасхин цуг авьяс иим мөргүләс авн эклнә. Цуг өрк-бүлмүдин байр ик мацг бәрсн хөөн темдглдг йоста бәәсмн. Пасхин онц темдгүдин иим — гегән гегәрлт, жирһл шинрүлгджәх темдг болжана. Эннь пасхальн өндгн болн куличмуд. Элстин болн хальмгин епископ Зиновий келсәр, Пасхин байр әрүн цевр өдр. Цаһан седкләсн цуг улсиг байрла йөрәжәнә. “Христос воскрес” үгмүдәр тадниг цугтаһинь күндлжәнә.
Пасхин хөөн болдг долан хонг әрүн седмица нер зүүнә. Пасхин байрин мөргүлд эс орлцсн улс эн өдрмүдт иим мөргүлд орлцж чадх. Байрин мөргүлмүд долан хонгтан болх.
Елена Алексенко, Хулхачин Николай
