Оютнрин нәр-наадн болх
Хальмгин государственн университетд йилһән сәәнәр сурһулян дасжах оютнрин байрин нәр-наадн болв. Энүнә йовудт көвүд-күүкдт мөнгнә мөрә болн ханлтын бичгүд бәрүлж өггдв.
Иим нәәрт тогтсн авьясар күүкд ке-сәәхн бишмүд өмснә, көвүд — смокинг өмсх зөвтә. Болв иим неквр эрк биш күцәх керг уга бәәсмн. Хальмгин дизайнермудын уйсн өдгә цагин хувцта көвүд-күүкд байрт талдан улсас йилһрсн уга. Эннь лидермудын нәр-наадн болв. Энүнд деед сурһульд оютнрин авсн медрл үнлгдв. Теднә тоод дөрвдгч курсын оютн Ноһала Манджиева йовна. Йилһән сәәнәр сурһуль дасдг күүкнд хөрн минһн арлснг мөрә бәрүлж өггдв. Арвн тавн минһн арслнг Церн Очиров авв. Энүнә келсәр, иим мөнг авад, өрк-бүлдән дөн күргх саната.
Церн Очировин келсәр, одахн оютнрин байр болв. Сурһулян йилһнә сәәнәр сурсн төләд арвн тавн минһн арслнг мөрә авч. Эн мөнгиг экдән өгв. Өгьяһар авсн мөнгән данцав. Өрк-бүлдән дөн күргхлә сән болна.
Ноһала Манджиеван келсәр, хальмгин университет мана энкр деед сурһуль. Энүнд экнь көдлж. Деед сурһульд сән медрл өгдгин тускар меднә.
Сурһулян йилһән сәәнәр сурдг оютнр дед сурһульд дала. Эдн сурһулян сәәнәр дассн деерән, университетин олна бәәдл-жирһлд шунмһа кеәвр орлцна. Эднә ик зунь олн-зүсн марһасин болн фестивальмудын призермуд. Баһчудын нәр-нааднд факультет болһна старост эврән бииһән үзүлв. Эднә биилсн ча-ча, румба, фокстрот би профессиональн биичнрәс йилһрдг болв чигн, иим би оютнр сәәнәр биилхәр шунв.
Оют Владислав Нуралиевин келсәр, иим керг-үүлдврт түрүн болж орлцжана. Ик байр үүдәв нәр-наадн.
Оютн Виолетта Колмакован келсәр, эндр аргентинское танго биилв. Сәәнәр биилхәр зүткв. Эврәннь факультетин нер харсв. Невчк үүмәд бәәв. Ик дааврта керг болж медгдв.
Ректор Бадм Салаевин келсәр, иим керг-үүлдврмүд оютнрин үүдәгч билг делгрүлһнд сән нилчән күргнә, иргч экономистнрин, юристнрин, багшнрин һардврин чинринь делгрүлһнд олз-туста болх. Энүнә тоолврар, иргчдән баһчуд Әрәсән номин болн сурһулин аһуд эврәннь танһчан сән кеәвр элчлх. Оютнрин мөрә нег минһн һурвн зун дөчн долан күн авв. Энүнә төлә Хальмгин университет хөрн сай арлснг йилһж өгв.
Байрин нәр-наадна йовудт бичкн биичнр олн оньг авлв. Келхд, Алтн нертә бииһин студин ханьд оютнрин көвүд-күүкд оржана. Эк-эцкнрнь сурһулян дасжасн кемд, бичкдүднь бииһин эрдм дасжана гиж баһ наста эк-эцкнр шоглж келнә.
Ээнән Ольга, Мятежный Максим
