Олн үртә өрк-бүлмүдт льгот өггдх зөвтә
Өнгәр һазрин участк авсн олн үртә өрк-бүлмүдт льгто өггдәд, эдн алв өгх зөв уга болх бәәдлтә. Энүнә туск төриг удл уга Әрәсән Федерацин Государственн Думин депутатнр хәләж, ирлцнһү заканд сольвр орулх зөвтә. Эннь бас учрта, юнгад гихлә, олн үртә өрк бүлмүд авсн һазртан гер бәрж чаджахш, энүг хулдхла ик алв өгх кергтә. Нег үлү, тавлдан зәром регимонмудт олн-үртә өрк-бүлмүд иим алв өгчәхш. Мана танһчд иим зака батлж авгдад уга.
Долорес Андрюшкеева зурһан үртә эк. Әрәсән закаһар энүнә өрк-бүл өнгәр хойр һазрин участк авсмн. Болв энүнд бәәдг гер бәрдг арһ уга болжана, юнгад гихлә тосхлтын материал үнтә, мөнгн күртжәхш. Участкиг хулдад, мөнгәрн бәәдг гер хулдж авхла сән болх билә.
Эднд өгсн участкс хотл балһсна ик захд бәәнә. Энд кергтә коммуникац, хату девскртә хаалһ болн талдан чигн кергтх таал уга. Тегәд чигн эднә учаскт ода дегд үнтә биш. Нег үлү, энүг хулдхла оруһас шингәж авсн мөнгнәс арвн һурвн процентн алвн авгдна. Нег сәнь, мөнгнә кемжән рыночн үнәс биш, кадастрин үнәс тоолгдна. Олн үртә Долорес Андрюшкееван келсәр, һазрин участк өнгәр өглә. Ода олн экнр алвна тускар меджәхш. Иим льгот олн үртә өрк-бүлмүдт эрк биш кергтә.
Ода Әрәсән зәрм регионмудт олн үртә өрк-бүлмүдт өгсн һазрин участкс муниципалитетмудын шиидврәр алв өгчәхш. Әрәсән закаһар немр алвна кемжәг субьектмуд эврән тогтаж чаджана. хальмг танһчд иим закан уга. Тегәд әмтн эрк биш алв өгх зөвтә гиж алвна министертсвд цәәлһвр өгв. Хальмг танһчар федеральн алвна церглтин әнгин ахлач Валерий Дорджиевин келсәр, Әрәсән закһар бәәрн йосн иим льгот эврән орулж чаджана. Зуг муниципалитетын шиидвр кергтә.
Талдан областьмудт олн үртә өрк-бүлмүдт льгто өгнә, мана танһчд иим льгот яһад уга болжахмб гиж олн үртә эк һундлтаһар келнә. Долорес Андрюшкееван келсәр, хам-хоша бәәх регионмудт иим зака батлж авч. Мана танһчд яһад иим закан эс батлж авгджахнь медгджәхш. Эннь һундлта йовдл болжана.
Иим улст һазрин участк йилһж өглһнә программ йир сән гиж Әрәсән Президент Владимир Путин келв. Ода Әрәсән Государственн Думин депутатнр алвна кодекст сольвр орулхин туск хәләх зөвтә. Эн сольврар һазрин участк авсн олн үртә өрк-бүлмүд алв өгшго. Кемр иим закан батлж авгдхла, иим өрк-бүлмүд льготта болх.
Гольдина Ирина, Колдан Церн
