Олимпийск һалын эстафетд орлцх улс белдвр кежәнә
Эн төрәр дәкәд нег зәнг тана оньгт тусхажанвидн. Олимпийск һалын эстафетиг Хальмг танһчин дөчн дөрвн күн авч йовх күндтә зөв авсмн. Тер тоод Сочинск наадна һалыг авч йовх даалһвр Арнзл Болдыревд өггдв. Энүнә келсәр, иим йовдл энүнд ик бахмж болжана, ик байр үүдәв.
Иргч бембә өдр январин хөрн тавнд олимпийск эстафет Элст балһснд ирх. Сочинск олимпиадын һол темдг авч йовх күндтә даалһвр Арнзл Болдыревд өггдв. Эн күн бат чанһ зангта күн. Инвалид улс эврәннь күцлдән күрч чадх гиж эн күн иткүлв. Арнзлын келсәр, олимпийск эстафетд орлцх йовдл энүнд ик байрта зәнг болв.
Арнзл Болдыревин келсәр, иим күнтә даалвр кехин тускар сонсчкад икәр байрлв. Иим олн улсас энүнд олимпийск эстафетд орлцх зөв өгснь ик байр үүдәв. Түрүләд эврәннь эк-эцкдән келв. Эдн энүлә хамдан икәр байрлв. Энүнә хөөн интернетар нәәжнртән зәнглв. Ода байрта йовдлыг тенкән уга гидгәр күләжәнә.
Арнзлын тоолврар, эстафет болн иргч олимпиад цуг Әрәсән улсиг негдүлжәнә. Эннь ик чинртә йовдл болжана. Спортд Арнзл йир дурта. Настольн теннис наадна, инвалидн тергәр дөрлддг марһанд орлцна. Энүнд Арнзл Болдырев олн ачлврмуд шүүж авч чадв. Сочи балһснд болх олимпиадат одх дурн бәәнә. Нертә хоккеистнр Овечкиныг, Малкиниг эврәннь нүдәрн үзх саната. Болв иим хол хаалһд йовдг арһ уга. Тегәд телевизорар биатлона, фигурн дошлһна болн хоккейин марһаг хәләх саната.
Арнзл Болдыревин келсәр, иим ик чинртә керг-үүлдврт орлцх санан ик урмд өгчәнә, нисх дурн күрнә. Өрүн болһн серәд, орчлнг деер бәәсндән байрлна. иим туужлгч йовдлд орхин тускар санжасн уга. Невчк үүмжәнә. Олимпийск һалыг байртаһар авч йовх кергтә. Эн йовдл энүнә санлд мөнкинд үлдх зөвтә. Ода белдвр кежәнә. Эрүл-менднь сән болхла, олимпийск һалын эстафетиг бахмжтһар авч йовх зура бәәнә.
Ода Арнзл олимпийск эстафетд тохнята белдвр кежәнә. Энүнд хойр зун тәвн метрт олимпийск бамбр авч йовх даалһвр өггдв. Эн өдр энүнә бәәдл-жирһлд хамгин хөвтә болн темдгтә өдр болж үлдх. Туужлгч йовдлд орлцх йовдл энүнә тодлврт мөнкинд үлдхмн. Тер мет эстафетин талдан чигн орлцачнр бас иигж санжана. Онц темдглхд, эн өдр хотл балһсна цутхлнг уульнцар машид йовж чадшго. Тер тоод Ленина, Клыковин, Пушкина, Буденна, Жанһрин, Сусеевин нертә уульнцар болн Остап Бендерин проспектар хаалһ хаагдв. Элст балһсна администрацин цәәлһсәр, эн өдр балһсар йовхар седхлә, эврәннь көлгн-күчәр эс гиж таксиһар йовж болх.
Ээнән Делгр, Ирчин Алексей
