Олеся Майдиборин һәәхүл секгдв
Пальмовин нертә келн-улсин музейд Әрәсән зурачнрин ниицәнә гешүн, Карачаево-Черкесск республикин искусствин ачта үүлдәч Олеся Майдиборин һәәхүл байрин бәәдлд секгдв. Зүрачин үүдәврмүдт келн-улсин авг-бәрц тодрха кевәр үүзүлгджәнә, күүнә болн йиртмжин негдлтин туск төрмүд босхгджана. Энүнд мана үүдәчг баг ил герч болв.Һәәхүлд зурачин дөчн көдлмш тәвгдв. Һәәхүл эн жилин декабрин арвн дөрвн күртл көдлх.
Олн-зүсн ке-сәәхн зургуд, фотозургудт цокж авснла әдл үүдхврмүд дүрслгч искусствд дурта улсин оньг авлв. Баһ наста зурач карандашин, өнгтә ширин дөнгәр эврәннь ухан-санаһан седүлж чадв. Классическ эрд-сурһуль дассн күүкн реализмин зөрүлт шүүж авад иим соньн үүдәврмүд үүдәнә. Сяха Явашкаева һәәхүл хәләхәр хамгин түрүнд ирв. Сурһульчин келсәр, һәәхүл зүрк авлм йир соньн.
Сяха Явашкаеваен келсәр, һәәхүл йир соньн. Эврән художественн школд орна. Шин зурачнр яһж зургудан зурсинь хәләх саната. Хамгин түрүнд мал-аһрус яһж зурснь соньн болжана.
Һәәхүлд дөчн көдмш үзж болх. Тер тоод Исса на коне, Любопытная четверка, Перед забегом болн нань чигн үүдәврмүд тәвгдв. Хурдн арнзлмудын гүүдл үзүлжәх зургуд баһ наста зурачин билг-эрдмд дурта улсин зүрк авлсмн. Олеся Майдиборин үүдәвлтд мөрд онц орм эзлжәнә.
Зурач Олеся Майдибор келсәр, мөрн нег ормдан удан зогсшго. Мөрнә шинж сәәнәр медх кергтә. Дигтә цаг шүүж авх кергтә. Цугин чикәр зурх кергтә. Иим көдлмш амр биш.
Директор Вячеслав Филимоновин келсәр, мөрнд зурач йир дурта. Тегәд чигн иим ке-сәәхнәр эдниг зурж чадна. Мөрнә занг үзүлхд амр биш. Баһ наста зурач оллн-зүсн янзар көдлжәнә.
Зурачин үүдәврмүдт Тенг һол, Ар Кавказин уул, энүнд бәәршлжәх улсин дүрмүд, ке-сәәхн йиртмж болн архитектур үзж болжана. Эннь зурачд өөрхн болн энкр болжана. Арвн тавн жилин эргцд Олеся Майдибор кесг зун зург зүрв. Әрәсән зурачнрин ниицәнә алтн медаляр ачлгдсмн. Зурачнрин болн энүнә үүдәлтд дурта улсин келсәр, ростовск зурач улсиг өврүлж байрлулна. Хальмг танһчд болсн межрегиональн пленэрт Олеся шунмһа кевәр орлцла.
Хальмг танһчин сойлын министр Амулнг Учурован келсәр, зурач болһн иим кевәр мөр зурж чадшго. Олеся мөриг дурлж зурна. Эннь хәләһәчнрт таасгджана.
Ода дүрслгч искусствд дурта улс соньн зургудла һәәхүлд таньлджасн кемд, баһ наста зурач дарани һәәхүл белджәнә. Иргч жилд Олеся Майдибор дәкнәс хурдн арнзлмудыг зургудт үзж чадх. Эн һәәхүл болхла декабрин арвн дөрвн күртл көдлх.
Ээнән Делгр
