«Наследие наших предков сохраним и приумножим» нертә жил болһн давулдг танһчин һәәхүл давв

«Наследие наших предков сохраним и приумножим» нертә жил болһн давулдг танһчин һәәхүл давв. Энүнд эрдм-сурһулин заведеньсин, школ-интернатмудын, бичкдүдин герин көвүд-күүкдин кесг соньн ке-сәәхн кегдлмүд күн болһнд үзж арһ билә.

12 наста Анастасия Хавалова танһчин бичкдүдин үүдәлтин цутхлнгд оржана. 5 жилин эргцд күүкн һарин эрдмәр кедг кегдлмүд таасж үүдәнә. Эн һәәхүлд Настя «Күрд» нертә кегдлиг үзүлв. Энүг күүкн нег сардан кев. hартан эвтә Анастасия цааснас олн-зүсн ан-аһрусн, урһмл болн хуучн газет-журнал олзлж нань талдан соньн кегдлмүд кенә.

Анастасия Хавалован келсәр, олн-зүсн кегдлмүд кехләрн олн-әмтнә туужла, авг-бәрцлә болн сойлла өөрхн таньлднав.

Нидн жил бисероплетение марһанд Настя 2-гч орм эзлв. Целинн района бичкдүдин цуктхлнгин сурһульчнр болхла эн һәәхүлд давста һуйрас кесн өврмжтә кеглдмүд нааран ирсн улсин оньг авлв. Яна Курдюкован «Малыш и Карлсон» гидг көдлмш экспозицин сән тоод орх.

Целинн района бичкдүдин үүдәлтин цухлнгин директор Нина Витанская келсәр, көдлмш болһн бичкдүд санан седклән өгж кенә. Эннь сән тааста йовдл болжана.

Ишкәһәс, арсас кесн кегдлмүд, кевсмүд ирсн улсин нүд авлв. Ут тоодан һәәхүлд 500 һар кегдлмүд билә.

Нанд зургуд, бисерас кесн кегдлмүд йир таасгдв. Өдгә цагин бичкдүд инновационн технологярр дегд икәр соньмчана. Тегәд эн һәәхүл көвүд-күүкдин сурһмжд ик нилчән күргнә.

Эн керг-үүлдврин бүрдәһәчнрин келсәр, һәәхүлин һол күсл билгтә бичкдүдин эрдмиг өөдлүлһн болһжана. Багшнрт болхла эүнә йовудт дамшлтарн хувалцх арһ бәәнә.

Танһчин бичкдүдин үүдәлтин цутхлнгин директор Ирина Очирован келсәр, һәәхүл иим нер зүүжәхнь учрта. Юнгад гихлә, мана өвкнрин авг-бәрциг әрүн кевәр хадһлх күцлтәһәр бүрдәгдв.

Билг-эрдмән үзүлсн көвүд-күүкд шишлн дипломар ачлгдв. Урднь санж йовсн санаһан күцәһәд, рәннь тускар олнд күрг медүлсн бас һол төр болжана.

Ээнән Дельгр, Котина Валерий