Мөкн заль бумбд дәкнәс бузр үгмүд бичж
Элст балһснд Мөнк заль нертә мемориальн комплексин эрснд дәкнәс бузр үгмүд бичәд, бузрдаж. Полицин дежурн әнгд Элст балһсна эдл-ахун һардачин зәнглсәр, Мөнк заль бумбд бузр үгмүд бичгдв. Сүл цагт Әрәсәд төрскән харсгч дәәчнрин бумбст иим әср йовдл дару-дарунь учрна.
Крастурьинск балһснд әмнәсн хацһсн дәәчнрин мемориалд баһчуд биилж, Волгоград балһснд бас вандализмин йовдл учрв, Элст балһсна мемориальн комплексин эрснд бузр үгмүд бичж. Хальмгин хотл балһснд бәәх бумбиг кесг дәкж зурж бузрдажана. Минь одахн энүнд бичсн зургудыг уһаж һарһла. Энүнд Элстин нег школын баһчуд бузр үгмүд бичәд, зургуд зурсн билә. Эднә бичсн зургудыг болн үгмүдиг мана программ үзүлсн билә. Дәкәд нег тодлад келхлә, Сталинград балһснд советск церг немшиг күүчснә далн жилин өөнин өмн өргнд мемориальн комплексин эрсиг зургудар баһчуд будсн билә.
Тиигхд тер дарунь әср баһчудыг бәрж авала. Эднә эк-эцкнр комплексин эрсиг зургудас цеврлж уһасмн. Ода болхла дәкәнәс иим зургуд бумбин эрст зургдж. Төрскн һазран хортнас харсж авад, әмнәсн хацһсн салдснрин бумбин чолунд дорас өсж йовх баһчуд бузр үгмүд бичәд, комплекс зургудар бузрдаж.
Мөнк заль бумбд бузр үгмүд бичгдж гисн зәнг Элст балһсна эдл-ахун һардачас хотл балһсна полицин дежурн әнгд орж ирсн бәәж. Элст балһсна эдл-ахун юрист Андрей Шеркешевин келсәр, эн йовдлар Элст балһсна дотр-дундын кергүдин әнгд эрлһ орулж өгч. Зака эвдсн абһчудыг олж авх кергтә. Эдниг уголовн засгла харһулх закан бәәнә. Харм төрхд, иим йовдл урднь бас учрла. Эннь уголовн дааврта йовдл болжана.
Иим зәнг авсна хөөн полицин көдләчнр тер дарунь шинжлт экләд кев. Специалистнр шинжлт кехин төлә кергтә көдлмш күцәв. Эн ичртх йовдл үсн улсас сурлһн кегдв. Элст балһсна олна диг-дара харлһна полицин ахлачин дарук Виталий Дорджиевин келсәр, мемориальн комплекст мөшклһнә оперативн баг йовулгдв. Цуг материал цуглугдв. Иим йовдл вандализм гиж тоолгдна. Закаһар һурвн сардан бәрәнд бәрх закан бәәнә. Ялын ормд көдлмш кех зөвтә эс гиж һурвн сардан бәрәнд авгдх зөвтә.
Элстихн ода ик үүмәтә бәәнә. Дорас өсж йовх баһчудын ухан-сананд юн болжахнь медгджәхш. Тер саам иим кеәвр зака эвдсн улс засгла харһулгдх закан бәәнә. Әср йовдл һарһсн баһчуд бәргдх гиж хотл балһсна улс нәәлжәнә.
Хавтхна Элла, Бадмаран Владислав, Котина Валерий
