Москван болн Санкт-Петербургин консерватормудын көгжмин школмудт сурчах хальмгин сурһульчнр концерт үзүлв

Шин жилин байрин өдрмүдт Элст балһснд государственн концертн залд Чайковскийн нертә Москван государственн консерваторин болн Римский-Корсаковин нертә Санкт-Петербургин консерваторин көгжмин школмудт сурчах хальмгин сурһульчнрин тооцана концерт болв. Келхд, иим соньн сойлын керг-үүлдвр жил болһн январин эклцәр болна. Дәкәд нег тодлад келхлә, иим көгжмин школмудт Әрәсән хамгин билгтә бичкдүд сурчана. Тер тоод тенд хальмгин элчнр бас бәәнә.

Арвн һурвн наста Элина Бадняева урднь чигн балһсна тәәз деер билг-эрдмән үзүлсн билә. Шин жилд күүкн нертә композитормуд Фридрих Бенда болн Макс Брух үүдәврмүд наадв. Зурһан жил хооран Элина Чайковскийин нертә Москва балһсна государственн консерваторьт орв. Түрүн болж көжмин школд күүкн долан настадан ирв. Тер цагас авн эн өдртән 5-6 час дурта эрдмдән тусхажана.

Данир Огаев болхла нарт делкән марһасин лауреат. Көвүнә келсәр, иргчдән зуг Әрәсн биш, нарт делкән нертә көгжмч болхар седжәнә. Алтана Дорслаева бас дала күсл тәвсн бәәнә. Концертд күүкн Италин нертә композитор Николо Паганини «Каприз №24» гидг үүдәвр наадв.

Концертд билгтә баһчудын багшнр бас орлцв. Дигтә эн улс көгжмин халхд түрүн ишкдл кежәх көвүд-күүкдт нөкд болна. Дәкәд болхла, эн керг-үүлдврт сурһульчнрин эк-эцкнр, элгн-садн, үүрмүд болн классическ көгжмд дурта улс ирәд, чикнә хужран ханһав. элст балһсна искусствин училишин директор Наталья Куш келсәр, көвүд-күүкдин эрдм жил ирвәс өсәд йовна, нег үлү эдн нертә композитормудын үүдәврмүд йилһән сәәнәр наадг болв.

Көвүд-күүкдин наадсн үүдәврмүд олн-зүсн билә. Күн болһн эврәннь дурта көгжмчин үүдәвр наадв. Цуг ирсн улс болхла цаган сергмжтәһәр давулснднь ик ханлтан баһ наста билгтнрт өргв.

Шаран Баира, Ээнән Делгр, Жамбин Дмитрий