Москва-Элст хоорнд йовдг автобусмудын билетин үн зака эвдж өсв
Элст балһсна прокуратурин зәнглсәр, Москва-Элст хоорнд йовдг автобусмудын билетин үн зака эвдж өсв. Дәкәд нег тодлад келхлә, июлин нег шинәс авн Москваһас Элст балһснд күрдг билет һурвн зун арслнгд үнтәрв. Элстәс Москва балһсн күртл болхла үн тер кевәрн үлдв. Пассажирмуд эрлһ орулж өгсн бәәж. Прокуратурин көдләчнр тарифмудын церглтин специалистнрла хамдан эн халхар бүртлһ кев. Энүнә ашин тускар мана сюжетд келгджәнә.
Москва балһснд одад, көдлмш хәәдг улс дунд Руслан Ематулин йовна. Тегәд Москва-Элст хоорнд йовдг автобусмудын зогсал болһниг сәәнәр меднә. Тегәд билетин кемжәнә үн икдснь эн баһ наста күн алнг болсн уга. Зуг ямаран учрар иим өслт болснь энүнд медгджәхш. Москва балһснд күрх билет хулддг менеджерин зәнглсәр, хаалһ уттад, бензина үн икдснәс көлтә иим өслт болв. Руслан Ематулина келсәр, иим акад бәәдл тогтв. Эннь тас хажһр болжана. Билетин үнин өслтин учриг әмтнд цәәлһсн уга.
Хальмг танһчин әмтн урднь бас иим өслт дааһад һарла. Болв урднь иим өслт иим ик кемжәтәһәр болдго бәәсмн. Москва-Элст хоорнд йовдг автобусмудын маршрутын кедү әмтн суудг ормин цааснас иштә эднә хаалһ Ставропольск крайин, Ростовск областин аһуһар давх зөвтә. Ут-турштан нег минһн зурһан зун хөрн хйор дууна. Иим кевәр хаалһин дууна икдснәс көлтә, бензина кемжән бас өсв гиж транспортникүд келнә. Болв иим автобусмуд Волгоградск областин аһуһар давж һарчав. Эн хаалһ ут-тоодан нег минһн хойр зун найн зурһан дууна тогтажана. Прокуратурин көдләчнр тарифмудын төрәр үүлджәх региональн церглтин специалистнрла хамдан эн туст бүртклһ кев. Көогн-күчнә фирмс государствин медлд бәәх билетин үн хаһр икдүлв гиж илткгдв. Элст балһсна прокурорин дарук Асмик Арутюняна келсәр, һурвн фирмин тускар уголовн керг күцәгджәнә. Тарифмудын региональн церглт иим өслт хаһжр гиж шинлхлә, эдн административн засгла харһулгдх. Эдн тәвн минһн арслнг ялд унх эс гиж һурвн жилдән әмт зөөдг зөв уга болх.
Асмик Арутюняна келсәр, билетин үн икдүләд, фирмин элчнр авсн оруһин кемжәнәс ял авгдхмн. Нег сәнь, июнин хөрн тавнас авн билетин үн урдк кемжәтә болв. Өдгә цагт Москва-Элст хоорнд йовсн цагт күн болһн урдк кевәр нег минһн зурһан зун долан арслнг өгх зөвтә. Болв меклгдсн әмтн хәрү мөнгән авх гиж нәәлжәхш.
Санкун Кермн, Колдан Церн
