МЧС-ин автопробег Элстд ирв
Түүмрәс әәмшг уга бәәлһнә төлә. Әрәсән МЧС-ин Өмн зүгин региональн цутхлнгин автопробег Элст балһсна хаалһар давж һарв. Энүнә орлцачнр Өмн үзгин федеральн округин ик балһсд күрх, тер тоод Волгоград, Әәдрхн, Краснодар, Майокп балһсдар давж һарад, Ростов-на-Дону балһснд төгсх. Автопробегин һол күцлнь — эврә дурар үүлддг түүмр унтралһан церглтд олн улс орулж авлһна төр болжана.
Андрей Москаленко түүмр унтралһан церглтд һучн жилдән көдлжәнә. Баһ дүүвр насндан түүмр унтралһан әнгд эврә дурар ирж көдлв. Ода автопробегиг һардж ирв. Цуг маршрутар байрин керг-үүлдврмүдиг секх күндтә зөв энүнд өгв.
Сальск балһсна түүмр унтралһна әнгин көдләч Андрей Москаленко келсәр, түрүләд эврә дурар үүлддг церглтин ханьд орж. Зуг энүнд удан бәәсн уга. Иим церглт күнд биш түүмр унтрадг бәәж. Хөөннь түүмр унтрална церглт орад көдлв.
Автопробегин һол күцлнь — эврә дурар үүлддг түүмр унтралһна зергләнд олн улсиг оурлж авлһна төр болжана. Энүнә маршрутнь — Өмн үзгин федеральн округин ик балһсдар давж һарх, тер тоод Волгоград, Әәдрхн, Элст, Краснодар, Майкоп балһснд күрәд, Ростов-на-Дону балһснд төгсх.
Әрәсән МЧС-ин өмн үзгин региональн цутхлнгин барин церглтин ахлач Ирина Гоголеван келсәр, эн кергт эврә дурн кергтә. Иим улс талдан әмтнд ик нөкд болжана. Ода Өмн үзгин федеральн округд тәвн долан минһн эврә дүрар үүлддг түүмр унтралһна көдләч бәәнә. Эн пробегин хөөн эднә то өсх зөвтә. Эдн талдн улст нөкд болж чадх.
Элст балһсна хаалһст автопробегин орцлачнр түүмр унтралһан техник үзүлсн хөөн, хотл балһсна цутхлнг талвнгд байрин керг-үүлдвр болв. Элстин бчикдүдин болн бөдүн улсин төлә түүмр унтралһна церглтин көдләчнр олн-зүсн марһа болн викторин бүрдәж давулв. Тер мет нааран ирсн улс бииһин билг-эрдмән үзүлв. Энүг зурһадчг тойгта эрдмин лицейин сурһульчнр олн улсин оньгт тусхав.
Эн көвүнә келсәр, училишд зергләнд йовдг дасна. церг сурһуль болна. Олн-зүсн марһан бүрдәж давулгдна. Иргчдән түүмр унтралһна көдләчин эрдж дасх саната.
Элст балһсар болн гүүлгәнд арвн негн түүмр унтралһна машин болн “БМВ” маркта хойр мотоцикл орлцв. Ода танһчин эврә дурар үүлддг түүмр унтралһна церглтд кесг зун күн оржана. Эдн олн-зүсн наста болн эрдмтә әмтн. Болв эдниг талдан улст дөн күрглһнә керг негдүлжәнә.
Хальмг танһчар МЧС-ин заллтин ахлачин дарук Николай Эрендженовин келсәр, эврә дурар үүлддг түүмр унтралһна церглтин көдләчнрт жирһл болн эрүл-менд даатхлһн кегднә.
Эврә дурар үүлддг түүмр унтралһна баг Хальмгин университетд бас бәәнә. Энүг давсн жилд бүрдәв. Ода энүнә ханьд хөрн тавн оют оржана. Чингс Харкибенов церглтин ханьд хамгин түрүн ирж орв. Энүнә келсәр, олн улсиг эврә дурар үүлддг түүмр унтралһна церглтд орулж авхин төлә иим керг-үүлдвр дару-дарунь бүрдәгдх зөвтә.
Хальмгин университетин эврә дурар үүлддг түүмн унтралһна церглтин әнгин ахлач Чингс Харкибеновин келсәр, университетин үэврә дурар үүлддг баг сурһуль бүрдәнә. Энүнә йовудт оютнриг болн көдләчнриг көдлжәх хораһас һарһж авлһна сурһуль болв. Энүнә хөөн условн түүмр унтрав.
Эврә дурар үүлддг түүмрн унтрлһна багмуд — түүмрәс әәмшг уга бәәлһнә туст хамгин түрүнд күцәх керг-үүлдврмүд теткх зөвтә. Энүнә хань күн болһн эврәннь көллжәсн һазртан орж чаджана. Бачм чинртә йовдлмудт нөкд болхар седсн улсин төлә иим организац бүрдәгднә.
Елена Алексенко, Бадмаран Владислав
