Лицейд багшнрин спартакиад болв
Күч-көлснд болн харслһнд белн бәәнәвидн. Иим нерәдлһтә хойр минһн арвн дөрвдгч жилд Сочи балһснд болх Олимпийск наадн нерәдгдсн марһан багшнрин дунд Элст балһсна лицейд болв. Дөрлдәнд орлцачнр гүүлһнә марһанд, дартсин, утдан һәрәдлһнә дөрлдәнд, цалм хайлһна марһанд болн талдан чигн дөрлдәнд орлцв.
Марһана зарһч болж сурһульчнр көдлв. Багшнр болхла эврәннь хувцан спортивн формд сольв. Дөрлдәнә йовудт эдн сурһульчнрин селвгүд тоод авч дөрлджәнә. Арвдгч классин сурһульч Адьяна Джевакован келсәр, зарһч болж көдлхд невчк соньн болж медгдв. Багшнрин спортын билгиг эдн чик кеәвр үнлхәр зүткжәнә. Дегд чанһ неквртәһәр зарһ кехлә, эннь хөөннь сурһульд үлмәһән күргх гиж күүкн шоглж келнә. Арвдгч классин сурһульч Адьяна Джевакован келсәр, эврәннь багшнран иим марһанд түрүн болж үзжәнә. Эннь соньн болв.
Дөрлдәнд орлцсн багшнр эврәннь командан "Смелые и ловкие", "Спортивная надежда Калмыкии", "Вдохновение и задор" нерәдв. Иим нерәдлһтәһәр дөрлдәд, спорт цогц-махмуд батрулна гиж эдн тоолжана. Марһана йовудт багшнр гүүлһнә, утдан һәрәдлһнә, дартсин, цалм хайлһна дөрлдәнд болн шаха наадлһнд дииләчән йилһв. Эдн цугтан хамгин спортивн занган үзүлж, олн балл олзлж авхар шунв. Эднә дөрлдәг сурһульчнр ик оньган өгч хәләв.
Иим спартакиад лицейд дөрвн жил дарандан болжана. Лицейин директор Татьяна Питкееван келсәр, иим дөрлдән сән зангшалд тохрв. Хаврин амрлһна өдрмүдт багшнр, бичкдүд болн эк-эцкнр орлцата олн-зүсн керг-үүлдврмүд энд бүрдәж давулгдна. Лицейин директор Татьяна Питкееван келсәр, иим дөрлдәнә һол күцлнь — сурһульчнр эврәннь багшнрасн үлгүр авх төр болжана.
Багш Елена Вадбольская тоолврар, эн жилин марһан хойр минһн арвн дөрвдгч жилд Сочи балһснд болх Олимпийск нааднд нерәдгдснь бас учрта. Иим спортын керг-үүлдвр спорт тархалһнд, нертә спортсменмүдин тускар медж авхд сән нилчән күргсн деерән, бичкдүдин эстетическ сурһмжд туслхнь лавта. Онц темдглхд, Элстин лицейд советин йосна цагт үүлджәсн ГТО-н комплекс сән үзмжтәһәр күцәгджәнә. Хотл балһсна талдан школмудт иим комплекс уга. Физкультурин кичәлмүдт онц оньг тусхах Әрәсән Президентин селвгиг лицейин көдләчнр эрк биш күцәх саната. Физкультурин багш Елена Вадбольская келсәр, спорт делгрлт авхин төлә государств спортивн плошадкс бәрх зөвтә, бичкдүдин спортд онц оньг тусхала сән болх.
Лицейин багшнр эврәннь сурһульчнртан класст үлүгүр болсн деерән, ода спортын залд бас үлгүр болжана. Эннь Элстин лицейин багшнрин тоолвр. Дөрлдәнд ончрсн багшнр дипломсар болн мөнгнә мөрәһәр ачлгдв.
Ээнән Ольга, Колдан Церн
