Лаганьд хуучн гермүдт бәәх әмтн шин бүүрт нүүж оржана
Эн жил хуучн нурад унжах гермүдәс әмт нүүлһнә танһчин программ мөнгн уга үлдх әәмшг бәәнә. Эн программ күцәлһнә кергт һарсн дут-дундсиг ахр болзгт ясж, иим төр эрк биш хаһлх кергтә гиж Хальмг танһчин толһач Алексей Орлов неквр тәвв. Эн туст онц оньг танһчин райодт өггдх. Зәрм райодт эн туст бәәдл ясржана. Үлгүрнь, Лаганя районд эн жил хойр давхрта долан герт капитальн ясвр төгсх.
Лагань балһсна микрорайон цаг ирәвс кеерәд, сәәхрәд йовна. ЖКХ-н халх шинрүлһнә сангин мөнгәр давсн жилд һурвн гер ясгдсн болхла, хойр минһн арвдгч жилд хөрн дөрвн герт әмтн нүүж орж чадв. Эн жил программд хойр давхрта долан гер орсмн. Болв һучн негдгч тойгта герин бәәрн әмтн ясврин көдлмш сәәнәр кегдв гиж келж чадх. Капиальн ясвр кехин өмн эднә гер йир му дүртсә бәәсмн, бәәцин таал уга билә. Ода болхла балһсна әмтн болж бәәнә, цуг кергтә тоот кегдв. Софья Колесникован келсәр, хур-цасн орхла ораһар дусал дусдг билә. Хәләтн тоосх нурж одв. Ода болхла яврин хөөн бәәдл тас талдан, бидн ик ханлтан өргжәнәвидн.
ТСЖ-н ахлач Людмила Чернован тоолврар, бооцаһар батлж авгдсн көдлмшин цуг кемжән федеральн мөнгн цаглань ирснәс иштә темдглсн болзгт күцәгдв. Тер мет патьрмудын эздүд бас эврә мөнгән цаглань орулж өгв. Әрәсән закаһар эдн зәрм мөнгиг эврән өгх зөвтә. Владимир Сокольниковин келсәр, герини ора ястл аптьр ботр ясвр кедг арһ уга билә. Ода шинкн гер дотран ясвр экләд кежәнәвидн.
Дәкәд болхла, эднлә хам-хоша бәәх һучн һурвдгч герт капитальн ясвр төгсхдән өөрхн. Лагань балһсна администрацин толһач Николай Гиренкон то-дигәр, капитальн ясвр кех эн жилин программд орсн долан хуучн нурад унжах герәс дөрвн гер эдлврт орулхдан белн, һурвн герт болхла ясврин көдлмш цаарандан кегджәнә. Гиренкон келсәр, батлж авсн бооцаһар олн давхрта гермүдт хамгин түрүн ораһинь шинрүлх кергтә бәәсмн. Эн хурц төр бәәрн улсиг хөрн-һучн жилмүдин туршарт икәр үүмүлжәсмн. Тегәд эн дааврта көдлмшиг тосхачнр сәәнәр күцәв.
Лаганя администрацин толһач Николай Гиренкон цәәлһсәр, ода бичкн көдлмш үлдв, һурвн герт усна кемжәнә то авдг прибормуд тәвх кергтә. Талдан дөрвн герт цуг көдлмш төгсв. Иргч жилд немр ЖСЖ секх санан бәәнә. Тиигхлә цуг гермүд федеральн программд орх.
Дәкәд болхла Лагань балһсна Западная нертә уульнцин гермүдт иим көдлмш бас цаарандан кегдхмн. Балһсна микрорайонд бәәх эн болн талдан һурвн герт капиатальн ясвр октябрин чилгчәр төгсх гиж Лаганя администрацин һардачнр бәәрн улсиг иткүлв.
Чучян Валентина, Очра Сергей
