Көтчнрә районд селәнә эдл-ахун көдләчнрин байр болв

Көтчнрә района селәнә эдл-ахун көдләчнр сән өдрән байрта кевәр темдглв. Энүнә йовудт агропромышленн комплексин делгрлтин халхар бәрсн үзмжин аш диглгдв. Ода районд хамгин сән эдл-ахусин тоод “Чапчаевин” нертә, “Сарпа”, “Шатта” болн “Ергенинский” йовна.

Төрскн һазртан чидлән нөөлго көдлжәх улсиг байртаһар тосж авв. Кеер мал өскжәх фермермүдт района һардвр онц ханлт өргв. Чанһ некрвтә рынкин таалд Көтчнрә района фермерск эдл-ахус давсн жиллә дүнцүлхлә, сән үзиж бәрв. Өдгә цагт районд ут-тоодан хйор зун найн дөрвн крестьянск-фермерск эдл-аух көдлжәнә, дөрвн племзавод бәәнә. Көтчнрә РМО-н толһачин дарук Геннадий Азотовин келсәр, агропромышленн комплексин үүлдврин сән үзмж района хот-хоолын көрн байжулна, бәәрн улсин бәәдл-жирһл чигн ясрна. Тер мет танһчин социальн — экономическ бәәдл ясрулһнд эдн ик тәвцән орулжана. Халун-киитнд тадн мал өскәд, өрк-бүлән тежәһәд, района экономикин делгрлт сән нилчән күргжәнәт.

Селәнә эдл-ахун көдләчнрин сән өдрлә нааран ирсн олн гиичнр халунар йөрәв. Хальмг танһчин олн-әмтнә хуралын ахлач Анатолий Козачкон келсәр, района малын хошмудт чидлән нөөлго көдлжәх улсин байр болжана. Района көдләчнр эврәннь һазрин бәәхтә жирһлин төлә болн бүкл танһчин делгрлтин төлә чидлән нөөлго көдлжәнә. Хальмгин толһачин болн олн-әмтнә хуралын депутатнриг йөрәл авч ирж. Көтчнрә района һардачнр эврәннь һазрин делгрлтин төлә чидлән әрвллго көдлжәнә.

Байрин хургин йовудт хамгин сән үзмж бәрсн малчнрт, хөөчнрт болн механизатормудт күндлһнә һашгуд бәүрлж өггдв. Селәнә һазрт көдлжәх улс ик кезәнәс авн күндтә көдләчнр гиж тоолгдна. Тер мет Көтчнрә района баһчудт түрүн Әрәсән паспорт байрин бәәдлд бәрүлж өггдв. Эдн иргчдән мана танһчин селәнә эдл-аухн делгрлтд бас орлцх улс болжана.

Гольдина Ирина, Очра Сергей