Көтчнрә районд бичкдүдин садын төр хаһлжана
Хойр минһн арвн зурһадгч жил күртл Әрәсәд дошкольн учрежденьд орх чеерүд уга болх зөвтә. Хальмг танһчд эн туст көдлмш девснг-девснгәр күцәгджәнә. Давсн жилин ашар Әрәсән Президентин даалһвр күцәсн регионмуд дунд мана танһч йовна. Инновационн программ олзлжах дошкольн эрдм-сурһулин учрежденьс дунд Көтчнрә района “Сайгачонок” нертә бичкддүин сад танһчин марһанд дөрвн жил хооран диилвр бәрсн билә. Марһана мөрән мөнгәр наадһас, ширә болн сандл хулдж авгдв.
Көтчнрә района Сайгачонок нертә бичкдүдин садын көвүд-күүкд ода чигн бичкн болв чигн, хальмг келәрн мендлж чадна, йөрәл келж өгнә, төрскн келәр бөдүн улсин күүндвр меддг болв. Дошкольн учрежденя багшнр кесг жилдән хальмг келнә делгртин программар көдлжәнә.
“Сайгачонок” нертә бичкдүдин садын һардач Татьяна Булуктаеван келсәр, давсн жилд немр хөрн орм секснә хөөн шин мебель, ширә, сандл хулдж авч.
Хойр минһн йисдгч жилд эн бичкдүдин сад инновационн эрдм-сурһулин программ олзлжах дошкольн эрдм-сурһулин учрежденьс дунд танчһин марһанд диилвр бәрсн билә. Зун минһн арслнг мөрән мөнгәр наадлһна оборудовань, ширә болн сандл хулдж авгдв. Ода болхла “Сайгачонок” бичкдүдин садын педагогическ коллекти дошкольн эрдм-сурһулин федеральн государственн кемжә орулһна программд орлцхар эрлһ орулж өгв.
Көтчнрә РМО-н эрдм-сурһулин болн солйын әнгин һардач Инна Бургуеван келсәр, пилотн программ хойр әнгәр күцәгдх. Негдгч әнгнь — шин оборудовань углж тәвлһн. Хойрдгч әнгәр бичкдүдинс ад эрдм-сурһулин халхар медрл авлһнд ик оньг тусхах. Коллекти хамдан кесг жилдән көдлжәнә. Эдн келн-улсин бичкдүдин садын программд орлцсн билә.
Түрүн болж бичкдүдиг эн сад далн хойрдгч жилд орулж авсмн. Тиигхд энүнд зун дөчн көвүн-күүкн оржала. Давсн жилд дошкольн учрежденьд шинрүлж яслһна көдлмш кесн хөөн немр хөрн бичкдүд садт орж чаджана. Тер бийнь дошкольн учрежденьд орх чеерүдиг эннь халһсн уга. Давсн жилин октябрь сард районд хойрдгч “Ромашка” нертә бичкдүдин сад секгдв. Энүнд йирн тавн көвүн-күүкн оржана. Нег жилин эргцд хуучн нурад унжах гериг шинрүлж тосхад, өөдән мергжлттә көдләчнриг орулж авад, шин оборудваонь хулдж авла. Шин сад секлһнә төлә хойр дундур сай арслнг кергтә болв.
Көтчнрә РМО-н администрацин толаһчин негдчг дарук Геннадий Азотовин келсәр, урднь эн гер хуучн нурад унжах гер билә. Олн-әмтнә дөнгәр ясж авла. района цутхлнг селәнә организацс амрлһна өдрмүдт нааран ирәд көдлв. Ясврин көдлмшин хөөн энүнд шин мебель хулдж авч, талдан чигн оборудовань шинрүлгдв.
Эндр өдр Көтчнрә районд зун һучн долан көвүн-күүкн садт орхар чеерүдт зогсжана. Ут-тоодан Көтчнрә районд дөрвн бичкдүдин дошкольн учреждень көдлжәнә. Алцнһуд, Шатта посеклст болн хойр сад района цутхлнг селәнд бәәнә. Района администрацин зурад поселкт бичкдүдин сад секх санан бәәнә.
Көтчнрә РМО-н администрацин толһач Валерий Очировин келсәр, эн жилин январин нег шинд кесн то-дигәр районд нег минһ һар бичкдүд бәәнә. Эднәс дөрвн зун дөчн дөрвн көвүн-күүкн садт оржана. Эн жилин сентябрь сард дәкәд нег зун һучн долан бичкдүдт дошкольн учрежденьд орх. Эднәс йирн бичкдүд Көтчнр селәнә сад одх, зурһан көвүн-күүкн Алцнһу поселкин садт орхмн. Дөчн бичкдүд Ергенинский поселкин садт орх зөвтә. Эн поселкд хуучн адын гер хадһлж. Энүг ясхин төлә йирн минһн арслнг йилһж өггдв. Герин ора шинрүлгдв, терз-үүдн сольгдв. Эн жилин хойрдгч кварталд шин сад белн болх.
Ода района ут-тоодан арвн минһн күн бәәршлжәнә. Эднәс нег минһн дошкольн наста бичкдүд. Нилх төрлһнә то икдүлһнә государственн программин нилчәр, жил ирвәс нилх төрлһнә то өсәд йовна.
Хавтхна Элла, Котина Валерий
