Көтчнрә хойр селәнд газ орулгдв

Эндр өдрт газ орулһна көдлмш Көтчнрә района һурвн поселкд күцәгджәнә. Эднәс хамгин ик Көглт селәнд кимд түлән цөн өдр болад орулгдх. Давсн амрлһна өдрмүдт болхла Һоожур болн Шовар поселкст газ ирв.

Селәнә улс ик кезәнәс авн күләжәсн төр хаһлгдв. Ода эднә селәнд ик байр ирв. Эднә байриг хувалцхар танһчин толһач Алексей Орлов ирв. Хойр жил хооран Көтчнрә района улсла харһлт кехләрн, хойр минһн арвн хойрдгч —хойр минһн арвн һурвдгч жилмүдт ким түлән ик болн бичкн селәдт ирх гиж иткүлсн билә. Энүнә келсн үг күцв. Һоожур селнәд хөрн өрк-бүл бәәнә. Энүнд малчнрин өрк-бүлмүд бәәнә. Малчнр өрк-бүлән тежәһәд, района делгрлтд эврәннь тәвцән орулжана.

Танһчин толһач Алексей Орловин келсәр, Көтнчрә район дик кезәнәс авн уул авьяс-зангшал хадлһжана. Малчнр бас энд тоомсрта. Эднә көдлмш күнд. Эндр газ ирнсә хөөн тана жирһл невчк гиигрх. Ода үвлин түлә белдж авх керг уга. Ода селәнд бәәж болх.

Көтчнрә района аһуд ик төсв күцәжәх компаньсин элчнриг эн өдр йөрәһәд күндлв. Ахр болзгт эдн газин станцс тосхв, поселкс хоорнд хөрн һар дуунда газин сурвлж татв. Тер мет селән дорт газ орулһна цуг көдлмш эдн күцәв.

Киитн өдрмүдин өмн өргнд селәнә әмтн эврәннь гертән газ орулж чадв. Тер тоод Садко Эренценовин өрк-бүл. Энүнә келсәр, ода селәнә әмтн балһсна улсла әдл бәәнә.

Һоожур селәнә бәәрн күн Очра Владимирин келсәр, урднь балһснд бәәж, ачта амрлһнд һарад төрскн селәндән хәрж ирв. Ода мал өскәд, өрк-бүлән тежәнә. Газ ирнс хөөн жирһл гиигрх.

Онц келхәд, йирдгч жилмүдт эндәс нүүсн улс хәрү хәрж иржәнә. Ода Һоожур селәнд цевр уудг усн бәәнә, ода газ ирв. Эврә онц эдл-аху өскәд, мөнг олж болх.

Тер мет ик байр Шорв селәнд бас ирв. Энүнд гиичнриг дууһар болн бииһәр тосв. Хальмгин домбрин әмтн дор ормдан зогсж чадлго биилнә.

Ик кезәнәс авн күләжәсн ким түлән эднә поселкд ирснь тенкән уга гидг байр болв.

Шорва поселкин күн Иван Нимгировин келсәр, поселкин улст шин жирһл эклжәнә. Урдкла әдл түлә белдх керг уга болв. Ода баһ наста өрк-бүлмүд эврәннь селәндән бәәж чадх.

Күч-көлснә ветеран, нертә механизатор Григорий Манджиевин өрк-бүлд ода догшн киитн үвл әәмшг учрашго. Эднә герт углж тәвсн газин беш эдн олзлад уга бәәж. Агчмин зуур герин эзн күүкд күн такан өндг шарад белдв. Ширә эргәд сууһад бәәдл-жирһлин тускар күүндв. Селәнә улст иим килмж өгчәх танһчин һардачнрт эдн ханлтан өргв. Григорий Очировичин тоолврар, районд махна комбинат эдлврт орхла, эднә бәәдл-жирһл ясрх. Энүнә аваль Зоя Васильевна болхла ким түлән гертнь ирснд ик байрта бәәнә.

Өдгә цагт Көтчнрә района һурвн поселкд газ орулһна көдлмш кегджәнә. Района ик Көглт селәнд цөн өдр болад бас газ орулһна ик байр болх.

Танһчин толһач Алексей Орловин келсәр, удл уга газ Сараха, Тугтн болн Яшкульск района Хар толһа селәнд күрх. Алексей Миллерла батлжа всн бооцан эн жил төгсжәнә. Ода шин программ «Газпромд» белджәнә. Танһчин селәдт газ орулһна программ хойр жилд эртәснь кегдв. Хойр минһн арвн доладгч жил күртл танһчин цуг селәдт кимд түлән ирх. Эннь танһчин һардачнрин һол кергнь негнь болжана.

Чучян Валентина, Максим Мятежный