Көк тенгсин көвәд нефтин сооруженьс тосхгдх
Хальмг танһчд Көк тенгсәс нефть һарһж авад, хадһлдг көвән сооруженьсин тосхлт эклв. Хар Һазра районд нефть гүүлгдг станцин өөр тосхлт эклснд нерәдгдсн байрин керг-үүлдвр болв. Энүнд цагин капсул һазрт даргдв.
Тосхлт эклснд нерәдгдсн байрин керг-үүлдврт “Лукойл” компаня элчнрлә хамдан Хальмг танһчин правительствин ахлач Игорь Зотов орлцв. Танһчин аһуд Ар Каспийн йиртмжин көрнг олзлһна түрүн төсв дунд көвән сооруженьс тосхлһна төсв болж һарв. Шин обьектмудын комплекс нефть хадһлһна болн цаарандан йовулһна төлә тосхгджана.
“Лукойл-Нижневолжскнефть” ниицәнә генеральн директор Николай Ляшко келсәр, өдгә цагт “Лукойл” компаньд дала программ бәәнә. Эннь Ар Каспийн йиртмжин көрнг олзлһна төсв. Тер мет газин сурвлжн тосхгдх. Иим сурвлжн Хальмг танһчин аһуһар давад, Буденновск балһсн күртл күрх. Эн долан хонгин чилгчәр Цекертинск көрнгд бурһудлһна көдлмш эклх. Эннь дорд үзгин Бирюзакск көрнг болжана. Энүнд Лукойл компань Хальгин нефтин компаньла хамдан йиртмжин көрнг шинжлж хәләх.
Шин тосхлт Хар Һазра района аһуд күцәгдх. Хамгин түрүн тосхлтын бичкн балһсн бәргдх. Тер мет энүнд инженерн залһлдан, газар болн усар тетклһнә систем, автоматиечск газостанц болн нефтин сурвлжн тосхгдхмн. Шин сурвлжар жилдән нәәмн сай тонн нефть гүүлгх.
Ут-тоодан көвән сооруженьс зун хөрн дөрвн дуунда татгдх. Танһчин правителдьствин ахлач Игорь Зотовин келсәр, иим төсв күцәхлә Хар Һазра района делгрлтд сән нилчән күргх, танһчин энергетическ комплексин көдлмшт бас сән таал бүрдәх. Тер мет шин төсв бәәрн улсин бәәдл-жирһл ясрулһнд туслх, Хальмгин социальн-экономическ делгрлтд ик тәвцән орулх. Энүнә нилчән олн улс көдлшмт орх, алвн танһчин бюджет орж ирх.
Хальмгин правительствин ахлач Игорь Зотовин келсәр, эндр бидн федеральн чинртә цугәрәсән төсв күцәлһнд орлцжанавидн. Тенгсәс һарһж авсн нефть көвән сооруженьст орулгдад, цаарандан һазадын ордудт йовулгдх. "Лукойл" компаня нилчәр Хальмгт шин эв-арһ олзлгдх, шин көдлмшч орм һарх, алвна ору орж ирх.
Ар Каспийн йиртмжин көрнгәс нефть һарһж авлһнд көвән сооруженьсин тосхлт Владимир Филановскийн нертә йиртмжин көрнг олзлһна сүл көдлмш болхмн. Шин тосхлт хйор минһн арвн тавдгч жилин дөрвдгч кварталд төгсх. Энүнә хөөн “Лукойл” энүг эдлврт орулж экләд көдлх.
Бевина Мергн, Бадмаран Владислав
