Күндтә багшин өөнин байр болв
“В здоровом теле — здоровый дух”. Иим нерәдлһтә волейбольн марһан Приютненск района Үлдчн поселкд болв. Дөрлдән физкультурин багш Григорий Нимгировин өнта өөнд нерәдж давулгдв. Эн жил энүнә багшин үүлдврин һучн хойр жилин өнн күцв. Школ төгсәсн олн улс дурта багшан йөрәхәр ирв.
Оньдин спортивн хувцта болн бишкүртә. Иим багшан сурһульчнр ода күртл тодлна. Ода чигн Гроигорий Нимгиров чан-чиирг, бат цогцта. Эндр болхла нааднд орлцго, командс дөннжәнә. Һучн жил һар школд физкультурин багш болж көдлжәнә. Далн зурһадгч жилд түрүн болж школд ирж көдлв. Цергәс бууж ирәд, Григорий педагогическ училишин физическ культурин әнгд орад сурв. Педучилиш төгсәснә хөөн төрсккн селнәд ирәд, школын бапгш болж көдлв. Һучн хойр жилдән Григорий Инджиевич эврәннь дурта эрдмәрн көдләд, кесг үй баһчудыг сурһв.
Чанһ-чиирг, заглһн, оньдин инәмсклсн багш ода чигн көдлмшән хайжахш. Һурниад гейрдж дассн угав гиж эн келнә. Түрүн авгтан энүнлә әдл школд экләд көдлсн багшнр кергтә таал уга школд экләд көдлсмн. Тиигхд физкультурин кичәлмүд үвл-зун уга һаза болдг билә. Тер жилмүдт волейбол нааднд дуран тусхав. Йирн хойрдгч жилд Үлдвн селәнд хойр давхрта шин школ эдлврт орулв. Тиигхд эннь көвүд-күүкдт болн багшнрт ик гидг байр болсмн. Ода энүнд ик спортвин зал бәәнә. Энүнд цуг кергтә оборудовань углж тәвгдв. Селәнә баһчуд сул цагтан нааран ирәд, дурта наадан наадна.
Күндтә багшин ончта өөнин байрт школ төгсәсн әмтн, района талдан школмудын багшнр болн района толһач Иван Кравченко ирв.
Келхд, багшиннь өөнин байрт волейбольн марһа бүрдәх седвәр гимназин сурһульчнр татсмн. Дөрлдәнд зурһан команд дииләчән йилһв. Тер тоод һурвн күүкд улсин команд наадв. Күүкд улсин командс дунд йирн тавдгч жилд школан төгсәсн күүкд диилвр бәрх гиж күләгджәлә. Волейболистнр сән белдвр үзүлв. Тегәд чигн марһан йир зүткәтә болв. Эврәннь дурта командан сурһульчнр болн гиичнр дөннв.
Григорий Нимгировин көдлмшин һол күцлнь — чанһ-чиирг баһчудыг өскәд, спортар соньмсулһн болжана. Эн халхар багш сән күцәмж бәрж чадв. Марһана ашар йирн тавдгч жилд школан төгсәсн күүкдин команд диилвр бәрв, хойрдгч орм района физическ культурин багшнин команд эзлв. Күрл мөшнгн медаль гимназин сурһульчнр шүүж авв. Хальмг танһчин физическ культурин болн спортын ачта көдләч Григорий Нимгировин ончта өөнин байр сергмжтәһәр давулгдв. Волейбольн марһан эн жиләс авн сән зангшалд тохрад оньдин бүрдәж давулхар шиидв.
Батан Санжирма, Очра Сергей
