Коррупцла ноолда келһнә төр хәләгдв
Элст балһснд танһчин правительствин ахлач Игорь Зотовин һардврта антикоррупционн комиссин дарани сүүр болв. Сүүрт хәләгдсн төрәр танһчин прокурор Алексей Самсонов доклад кев. Эн жилин зурһан сарин эргцд коррупцин халхар жирн хойр зака эвдсн йовдл илткгдв.
Хальмг танһчин толһач Алексей Орловин даалһврар болсн комиссин сүүрт зөв-йосна органмудын һардачнр, министерствсин элчнр, олна организацин гешүд орлцв. Энүнд һол төр болж — баһ болн дунд бизнесин элчнр бүртклһнә органмудла хәрлцә тогталһна төрмүд хәләгдв, арһлачнриг административн халхас дарлт келһнә төрәр күүндвр кегдв.
Арлачнрин зөвин элч Сергей Нестеровин келсәр, танһчин цуг арһлачнр йосна органмудас өөлүлшгоһан медх зөвтә. Кемр иим дарлт болхла, зөв-йосна органмудт эс гиж арлһачнрин зөвин элчд ирәд, дөн сурж чадх.
Коррупцин халхар зака эвдсн йовдлмудас көлтә һарсн һарун кемжән эн жилин эклцәс авн зурһан сай арслнг тогтав. Авлһ авсн арвн зурһан күн зарһин шиидврәр засгла харһулгдв. Өдгә цагт мөшкәчнрин шинжлтд коррупцин тускар дәкәд хойр керг бәәнә. Энүнә тускар мана танһчд олн улс хоорндан күүндв. Иим нег йовдлар нег сай нәәмн зун минһн арлснг авлһ авснь олн улсиг икәр соньмсулв.
Государтвенн алвна инспектор эс данцасн алвна кемжәг баһрулхин төлә арһлачнрас авлһ сурж. Тер мет зурһан сарин эргцд хөрн зака эвдсн йовдл илткгдв. Эннь келн-улсин төсвс күцәлһнә төлә йилһж өгсн мөнг хулхалсн йовдл учрв.
Танһчин мөшклһнә комитетин һардач Денис Минина келсәр, эднә церглт зуг йосна эрлм орулж авна. Талдан халхар ирсн зәнг хәләж болх. Зуг эдн иим көдлмш кежәхш. Сүүрт олз-туста күүндвр кегдв. Энүнд орлцачнриг иим төр соньмсулжана. Коррупцла ноолад келһнә төлә цуг арһ-чидл олзлгдх.
Коррупцин халхар зака эвдсн йовдлмудыг илткж авлһна туст зөв —йосна органмуд көдлмшән хашнгар кежәнә гиж Хальмг танһчин толһачин администрацин һардачин дарук Санл Басангов эврәннь докладтан темдглв. Энүнә келсәр, иим йовдлмудын тускар хоосн үгмүд келгднә. лайф Хальмг танһчин толһачин администрацин һардачин дарук Санл Басанговин келсәр, әмтн ирәхд коррупцин тускар келхлә, органмуд эклхд көдлнә. Тадн эврән иим йовдлмуд илткж авх зөвтәт. Тадна медлд цуг арһ-чидл бәәнә, көдлх әмтн бас бәәнә. Көдлх кергтә. Коррупц мана өөр бәәнә. Энүнлә ноолда кехмн.
Мана танһчин аһуд коррупцин халхар зака эвдсн йовдлмудыг гетлүлһнә болн илткж авлһна тускар күцәх керг-үүлдврмүдин зөв-йосна органмудын һардачнр сүүрин чилгчәр зура батлж авв.
Бевина Мергн, Очра Сергей, Котина Валерий
