Коммунальн церглт мууһар көдлснәс көлтә Элст балһсна әмтн ик зовлнг үзжәнә
Элст балһсна әмтн коммунальн церглт мууһар көдлснәс көлтә ик зовлнг үзжәнә. Усна сурвлжна болн канализацин турвас хаһрна, герин ораһар дусал дусна. Иим йовдл өдр болһн гилтә учрна. Некрасовин нертә уульнцин нег герин подьезд яссн цагт әмтн зеткртә йовдлла харһх әәмшг учрв.
Галина Лиджиеван келсәр, эднә бәәсн обшежитьд пол ясжасн бәәж. Документ авч йовад, нүк үзлго, унж. Тенд бабчг болн му үнрв һарв.
Пенсионеркин цәәлһсәр, иим ясвр кежәхин тускар урднь саглулгч темдг тәвсн уга бәәж. Нег үлү, һазаһас генткн харнһу герт орхла юмн үзгдхш. Иим әәмшгтә участк секәтә үлдәсндән унсн күүкд күүнә өөр бәәсн көдләчнр гемән сурсн уга гиж медәт келнә. Күүкд күүг танһчин больницд күргв. Нег сәнь, ик шав авч уга. Эмчнрин тоолврар, пенсионерк көл-һаран хамхлж уга. Ода эн төрәр участкин полицин көдләч шинжлт кежәнә. Болв эн халхар кесн мөшклһн сән ашта болхий аль угай? Медгджәхш. Күүкд күн зеткрлә харһв гиж домоуправленьд келнә. Ах инженер Санан Бикаевин келсәр, энд ясвр кегджәхин тускар болн коридорт пол секәтәһинь күүкүд күн медсн бәәж. Зеткртә йовдл өрүн учрсн билә. Әәмшг угаһар көдллһнә зокал эвдсн тускар көдләчнр нужахш. Жанһр нертә герин залтин ах инженер Санан Бикаевин темдглсәр, секәтә полын эргнд тасм татсн уга бәәж. Һаза иим ясврин көдлмш кегдхлә, иим тасм татгдна.
Харм төрхд, сүл цагт залврин компань улсин тускар санлго эврәннь һол көдлмшән мууһар кедг йовдлмуд хотл балһснд дару —дарунь учрна. Элстин һурвдгч микрорайонд бәәх хотл балһсна поликлиникин филиалд ода күүкд улсин консультацин нег әнгнь бәәнә. Энд ЖЭУ бас эврәннь даалһвран мууһар күцәжәх бәәдл мана үүдәгч баг үзв. Энд бүкл жилдән деер бәәх турваһас усн һоожна. Күүкд улсин консультацин әнгин һардач Кермн Урхаеван келсәр, нег жилд иим түрү бәәдл тогтжана. Күүкд улсиг хәләж эмнүлдг арһ уга, тер мет му үнр һарна.
Медицинск учрежденя завхозин келсәр, “Буревестник” нертә залврин компаньд кесг дәкж одад, ясвр кехин тускар сурж. Эднлә шишлнг бооцаг уга гиһәд, компаня һардвр дөн күргжәхш. Эн герт кезә ясвр кехин тускар мана үүдәгч баг ирсн кемд участкин мастер тодрһахар хәрү өгч чадсн уга. Жилишн инспекцин көдләчнрин цәәлһсәр, герт бәәх турваг эрк биш залврин компань ясх зөвтә. Жилишн инспекцин көдләч Владимир Налгировин цәәлһсәр, кемр эн йовдлын тускар эрлһн орж ирхлә, бүртклһн кегдхмн.
Олн давхрта гермүдт бәәх улс залврин компаня су көдлмшин тускар дару-дарунь эрлһ орулж өгнә гиж жилишн инспекцин специалистнр келнә. Жилишн коммунальн халхар хүврлт болад, ода шин систем үүлджәнә. Бол эн халхд хуучн көдләчнр ода күртл кезәнк цагла әдл көдлжәнә. Сән халхар ик сольвр энд болжахш.
Татьяна Дмитриева, Хавтхна Анатолий, Хулхачин Николай
