Колонск боодгт олн әмтн одад, конькиһар дошжана
Сүл өдрмүдт чилгр нарта өдрмүд тогтв. Иим кемд олн әмтн һаза һарад, цевр аһар киихдән дурта. Эн жил Элст балһснд Колонск боодгт конькиһар дошдг бәәрн бүрдәгдв. Тенд хойр плошадк цеврлгдж белдгдв. Энүнә негнь зуг хоккей наадхин төлә тогтагдж. Келхд, үвлин кемд бичкдүд болн бөдүн улс зуг энд конькиһар дошж чадх. Шин жилин байрин кемд болн эн өдрмүдт аһарин кемжән арвн градус күртл киитрсн цагт мөсн деер олдн улс цуглрж сул цаган сергмжтәһәр давулжана.
Нәәмн наста Эрика түрүн болж конькаһар дошхар ирж. Тер бийнь бичкн күүкн конькиһар эргәд, һәрәддг дасж авв. Энүнә эк Гиляна Очр-Горяеван келсәр, күүкнь мөснд һархдан әәхш, юнгад гихлә зунын кемд роликин конькиһар дошад дасчкв. Иим дамшлт мөснд кергтә болв. Гиляна Очр-Горяеван келсәр, күүкнь түрүн болж мөснд дошжана. Дәкәд болхла көвүнь бас нааран ирв. Эдн эврәннь нәәжнртәһән наадна. Иим һазрт бичкдүд сул цаган сергмжтәһәр давулж, цогц-махмудан батрулжана. Көвүд-күүкд ик байрта бәәнә.
Арвдгч классин сурһульч Яна Уланова болхла конькиһар сәәнәр дошна. Ода Москва балһснд сурчана. Тенд өдр болһн гилтә катокд одна. Колонск боодгин мөсн Москван мөснәс му биш, энд мөсн тиньгр, нег үлү цевр аһар кииләд дошхд сән болна. Яна Уланован келсәр, һурвн өдр дарандан нааран ирж дошжана. Өдр болһн шин әмтн нааран ирнә. Эднә то өсәд йовна.
Хоккейд дурта әмтн болхла энд бас олн. Эдн салу һазрт наадна үүд углж тәвж, эврәннь чидләрн мөс цеврлнә. Хоккей наадар ик баһ уга соньмсдг болв. Сергей Туркмедовин келсәр, бичкн цагасн авн хоккейд дурта. Тер цагт иим спорт олн дунд сән делгрлт авчала наадхдан . Кесг жил хооран Элст балһснд олн әмтн хоккей дурлж нааддг билә. Сүл цагт эн соньн наадыг әмтн мартад бәәв. Давсн жилд Сергей түрүн болж мөсн деер һарч дошв. Сергей Туркмедовин келсәр, бичкн цагтан мөсн деер дошсн дамшлт мартгдж уга.
Баһ цагтан дошж йовснла әдл болж медгднә. Цогц-махмуд батрна, чеежд сергмж өгнә. Үвлин кемд баһчуд мөсн деер дошад, сул цаган сергмжтәһәр давулхла сән болх. Элст балһснд талдан иим орм уга болжана. Тегәд элстихн дегд икәр байрлад, өвәрц спортд дуран өгчәнә.
Ода Элст балһснд конькиһар дошдг талдан һазр уга. Тегәд чигн элстихн иим өвәрц спортар соньмсж, ик сергмж авчана. Иим бәәр тогтасн улст ик ханлт өргжәнә. Каникулд бичкдүд сул цаган олз-тустаһар давулх арһ учрв. Түрүн авгтан конькиһар зогсхд күнд болв.
Унад, аштнь конькиһан суһлв. Күүкнь болхла кедү дәкж унсн бийнь, цаарандан дошдг эрдм дасчана. Конькиһар дошдг иим катокмуд кергтә. Тиихлә мана танһчд спорт делгрлт авх. Олн улс конькиһар дошдг дасж авх. Зәрм әмтн бичкндән конькиһар дошж йовсан мартсн уга. Хотл балһснд иим олн бәәр секх кергтә.
Колонск боодгт әмтн конькиһар дошдг һазр секхин төлә давсн жилин декабрь сард хотл балһсна эдл-аху ирлцнһү көдлмш эклсмн. Ода энд коньки авч болх, хоккей наадг клюшкс бәәнә, халун хот-хол чигн ууж болх. Ода деерән мөсн һучн сантиметрт көрч.
Специалистнрин келсәр, конькиһар дошхд әәмшг уга. Тер бийнь бийән саглх кергтә гиж эдн келнә. МЧС-ин цутхлнгин госинспектор Валерий Бордаевин келсәр, мөсн хөрн тавн сантиметрт көрхлә, хоккей наадж болх. Олн әмтн әәмшг угаһар мөснд һарч болх.
Элст балһсна эдл-ахун харслһна станцин ахлач Валерий Егоровин темдглсәр, олн әмтн әәмшг угаһар дошхин төлә цуг таал бүрдәгджәнә. Түрүн болж конькиһар дошжах улсиг әмтн дөннжәнә. Эдн иим улст нөкд болад, дамшлтарн хувалцжана.
Эн өдрмүдт Колонск боодгт олн әмтн ирж сул цаган сергмжтәһәр давулжана. Хамгин олар әмтн асхлад нааран иржәнә. Зәрмдән энд хойр зу һар күн цуглрна.
Татьяна Зубцова, Настан Сергей
