Келн улсин театрт Тимофей Алексеевд нерәдгдсн санлын асхн болв

Шидр Баатр Басанговин нер зүүжәх келн улсин театрт хальмг танһчин түрүн режиссер Тимофей Алексеейвд нерәдгдсн санлын асхн болв. Дигтә жил хооран күнд гемин уршгар нертә режиссер сәәһән хәәв. Олн жилмүдин эргцд энүнлә хамдан көдлсн артистнр, таньл үзл, үр иньгүднь санлынь тодлад бүлән үгмүдән нерәдж келв. Тимофей Алексеефин бәәдл жирһлин, энүнә сурһульчнрин тускар мана белдсн зурцд хәләж чаджанат.

Тимофей Алексеейвин санлын асхн олар әмтн хурв. Эн асхн режиссерт хамгин өөрхн улс ирв. Санлын асхн ирсн улс нертә режиссерла түрүн өдрәс авн көдлсн улс. Энкрләд энүг үр иньгүдн Тима гиж нерәдг бәәсмн. Эн билгтә күн хальмг келндән, авьяс заншалдан халуч күн билә. Эврәннь кеж күцәсн зураһин тускар өөрхн улстан дангин келдг бәәсмн. Тимофей Алексей Эрктн ансамблиг бүрдәв, эн ансаблин һардач болад олн жилдән артистнрлә холл һаалһд һарад йовдг бәәсмн.

Эн асхн олн әмтн эн билгтә күүнә тускар кесг бүлән үгмүд келж өгв. Эн харһллтд артистнр эврәннь һардачин тускар соньн фильм белдәд олн улст үзүлв. Дәкәд болхлаг кесг дуд күн болһн сонсч чадв.

Эн асхн ирсн күн болһн тәәз деер һарад Тимофей Алексеевин тускар санлынь тодлад кесг соньн юм келж өгв. Билгтә режиссер әмд бәәсм цагт кесг спектакльмуд тәвж чадв, эндр өдр олн әмтнд энүнә үүдәсн спектакльмудт ирж хәләнә. Тимофей Алексеев Ленинградск театрин, көгжмин болн кинематографин институт чиләсмн. 1974 жилд Хальмг Государственн филармонин һардач болж үүлдв. Хөөн художествен наадна театрин һардач болж көдлв.

Алексей Баатрович хальмгин билгтә үүлдәчнрин тоод оржана, энүнә нилчәр хальмг телеүзгдлин алтн фонд бүрдәгдв. Эн билгтә күн олн әмтнә жирһлин хаалһин тускар кесг соньн зурцс олн улсин оньгт тусхав.