Келн-улсин театр шин сезонд белджәнә
Ода сойлын зәнг. Эн өдрмүдт хальмгин келн-улсин Баснга Баатрин нертә театр шин сезонд белдвр кежәнә. Хәләһәчнрин төлә эдн шин наад белджәнә. Хувц уячнр болхла актермудт шин костюм уйжана. Тогтсн авясар театрин коллектив шин сезог Баснга Баатрин бичсн Булһн наадар эклх. Мана зәнгч Ээнән Ольга тетарин белджәх наадын тускар келжәнә.
Баһ наста артист Очр Такаев шин дүр тоһруна дүр наадхар белджәнә. Иим өвәрц дүр наадхин төлә ижлджәнәв гиж эн келнә. Энүнә тоолврар, бат иньглтин туск тууль уйн наста хәләһәчнрт сән сурһмж өгх. СНХ Театрин артист Очр Такаевин келсәр, энүнә нааджах дүр бичкн тоһрун. Бичкн болв чигн, күцлдән күрнә. Нисдг дасжана. Шовуд үргәч бас нисхәр седнә. Энүг нисдг дасххин төлә бичкн тоһрун талдан шовудас хоцрад, энүг дасхна.
Дәкәд болхла баһ наста актер Хальмгин олн-әмтнә шүлгч Эрнжәнә Константина тодлврмудар тәвсн Колыма —чудесная планета нертә моноспектакльд наадх зөвтә. Театрин художественн һардач Борис Манджиевин келсәр, лагерн бәәдл-жирһлин тускар болн тенд суусн улсин ухан-санан тускар медүлхд жанһрта төр болжана. Нармин Морхаджин Цаг селгәтә нертә пьесар тәвсн шин көгжмин шог наадн хәләһәчнрт соньн болх зөвтә. түрүн болж үзүлгдх Голубоглазая каторожанка нертә наадн хальмг улсин һашута цагин тууврт йовулһна далн жилин өөнд нерәдж тәвгдх. хальмгин олн-әмтнә бичәч Алексей Бадмаевин келврин һол дүр — хальмг күүкнд амр биш жирһлин төрмүд хаһлх кергтә болна. Түрүн дурн, хәрд һарлһн, Сиврт нүүлһснә цаг үзүлгджәнә. Цуг эн күнд зовлнгиг бичкн күүкн дааж һарад, келврин ашт бат болн ноолданас әәдго күүкд күүнд хүврнә.
Ода театрин зурачнр, хувц уячнр актермудын дүрмүд үзүлхд дөн күргж, хувц-хунр болн талдан чигн тоот белджәнә. Хувц уяч Лидия Ангучаеван тоолврар, театрт ирсн хәләһәчнр хамгин түрүнд артистын хувц шинжлж хәләнә. Сцен деер костюм актерин дүр наадхд туслх зөвтә.
Хальмгин театрин баһ сценд Шекспирин үүдәсн Ромео болн Джульетта наадн һол орман эзлх. Билгтә актермудын коллектив Шекспирин бичсн амр биш наад үзүләд, хәләһәчнрән байрлулх зурата. Шин театральн сезон соньн болх гиж эдн нәәлжәнә.
