Йовһн улс эс гиж жолачнр хаалһин зокал эвднә?
Эн жилин эклцәс авн мана танһчин хаалһст далн дөрвн зеткртә йовдл учрв. Энүнәс көлтә долан күн әмнәсн хаһцв, далн һурвн күн шавтв. Тәвн зеткртә йовдл йовһн улсин гемәр учрв. Мана танһчин хаалһст иим йовдл болдгин учрнь ямаран, Госавтоинспекцин көдләчнр ямаран гетлүлгч керг-үүлдвр күцәжәнә.
Любовь Пахомова Элст балһсна зурһадгч микрорайонд бәәнә. Иим догшн халун өдр өдмг хулдж авхар һаза һарсн бәәж. Хаалһиг зокал эвдж давж һарна гиж күүкд күн келнә. Иим кевәр магазинд күрхд өөрхн.
Любовь Пахомова келсәр, әмтн йовхла дахад һарв. Эн хаалһар өөрхн, зогсал күрхд амр.
Эннь хаалһин зокал эдвсн дәкәд нег күн — Юрий Сусляков. Энүнә тоолврар, хаалһ чикәр керчж давжана. Энүнә келсәр, энд урднь йовһн улс йовдг хаалһ билә, ода темдгнь билрж одв. Тегәд эн халхар хаалһин церглт көдлх зөвтә гиж залу күн келнә. Хаалһд учрдг зеткртә йовдлд йовһн улс немтә болна гиж Юрий Сусляков темдглв.
Юрий Сусляковин келсәр, урднь энд йовһн улс йовдг хаалһ бәәж. Ода темдг уга болж одв. Хаалһин церглтс мууһар көдлжәнә. Элст балһснд жолачнр сурһмж уга. Талдан балһсдт машид зогсад, кү күн һархинь күләнә. Әәдрхн балһснд й овһн кү жолачнр үзхләрн зогсна. Энд болхла әмт үзлго машид гүүлгәд йовж одна.
Жил болһн Әрәсән хаалһст учрдг зеткртә йовдлмудас һурвна кеснь нег хүвнь йовһн улсиг дәврдг йовдл болна. Энүнә учрнь ил. Жолачнр йовһн улсин зөв тоод авлго хаалһар йовлһна зокал эвднә, йовһн улс чигн хаалһин зокал күцәхш. Эн жилин эклцәс авн танһчин хаалһст йоһвн улс орлцата далн дөрвн зеткртә йовдл учрв, энүнәс көлтә долан күн әмнәсн хаһцв. Ахрар келхд, жолачнр болн йовһн улс нег-негән күндлхш. Хаалһар йовлһна зокал эдн эвднә.
Госавтоинспекцин көдләчнр хаалһст йовһн улс орлцата зеткртә йовдлмуд гетлүлһнә төлә оньдин ирлцнһү керг-үүлдврмүд бүрдәж давулна. Хойр минһн арвн негдгч жиләс авн мана танһч “Охота на зебру” нертә цугәрәсән керг-үүлдврт орлцжана. Энүнә программар йовһн улс йовдг хаалһс шинрүлж яслһна көдлмш кегдв. Тер тоод докья өгдг светодиодн светофор бәәнә, йовһн улс йодвг хаалһин өмн болн хөннь искусственн боомтг тәвгдв. Тер бийнь әмтн хаалһар йовлһна зокал эвднә.
Хальмг танһчин ГИББДД-н ах инспектор Василий Кекеевин келсәр, ода йовһн улс хаалһ керчдг бәәрн онц оньг тусхагджана. Нег үлү, сурһулин заведеньсин өөр. Иим һазрт хаалһд шишлнг темдг бәәх зөвтә, талдан чигн ирлцнһү темдгдүд тәвнә. Ода илтксн цуг дуту-дундсар һардачнрт эрлһн бичгдх. Иргчдән эн халхар бүртклһн өдр болһн кегдх.
Келхд, хаалһд йовһн улс хамгин харслт уга әмтн. Болв зәрмдән эдн хаалһд учрдг зеткртә йовдлд гемтә болж һарна. Ода хаалһиг зокал эвдж давж һархла хойр зун арслнг ял өгх кергтә. Зуг иим ялас әмтн әәхш. Тегәд йовһн улсин дааврин чанһах кергтә. Юнгад гихлә хаалһар йовдл зокал цуг әмтнд әдл. Эн залу күүнә келсәр, йовһн улс шишлнг һазрт зогсад телефоһар күүнднә, машид йовхд боомтг учрана. Энүнә күүк зеетәһинь машин дәврж. тегәд йовһн улсиг оньдин күләһәд, давулна.
Автоинспектормудын тоолврар, бичкдүд хаалһар йовлһна зокалыг бөдүн улсас сәәнәр меднә. Эн туст бөдүн улс му үлгүр эднд өгнә. Хаалһин зокал эвдсн һол учрнь иим — әмтн залхурад, хаалһ давж һаршго һазрар йовна, әмтн адһна, даавр угаһар хаалһд йовна.
Ольга Поддубная келсәр, эн һазрт йовһн улс йовдг һазр тогтах кергтә Юнгад гихлә, энүнәс холл биш поликлиник бәәнә. Эн көвүнә келсәр, наһан гер шатхла йовж болх, кемр улан герл шатхла йовж болшго. Хаалһар йовлһна зокал жасж авч.
Зунын кемд хаалһар йовдг машидын то зөвәр өснә. Энүг йовһн улс тоод авад, хаалһар йовхларн саглх зөвтә, оньган геехмн биш. Залхурлго йовһн улс йовдг хаалһд күрәд, эрүл-мендән харсж болх. Тер мет жолачнр бас хаалһд ик оньгтаһар йовж, йоһвн улс йовдг хаалһд улсиг давулж һарһх зөвтә.
Елена Алексенко, Максим Мятежный
