Ик Царнг селәнә улс уудг усар эн жилин чилгч күртл теткгдх зөвтә

Эн жилин чилгч күртл Октябрьск района Ик Царнг поселкин хамгин хурц төр уудг усар тетклһнә төр хаһлгдх. Танһчин правительствин ахлач Игорь Зотов Октябрьск района селәнә улсиг уудг усар тетклһнә обьетмудын тосхлтын көдлмш бүрткж хәләв. Ода усна шишлнг сав белн болв, поселк дунд усна сурвлжна тосхлтын көдлмш төгсж йовна. Цуг эн төрмүдәр Игорь Зотовин һардврта селвлцәнд келгдв. Ода деерән района цутхлнг поселкин улс зөөврин усар бәәнә. Әмтнә тоолврар, ззөврин усн санитарн кемжәнлә ирлцжәхш.

Шин насосн станц болн ус цеврлдг сооружень тосхсна хөөн Ик Царнг селәнә бәәрн улс сән чинртә уудг усар теткгдх. Декабрин хөрн тавнд обект эдлврт орулсн цагт энүнәс уудг ус экләд өгх зура бәәнә. Ода цуг белдврин көдлмш энд кегджәнә. Тер мет поселк дунд усна сурвлжна тосхлтын көдлмш төгсхдән өөрхн.

Социальн ик чинртә обектын тосхлт Юг России нертә федеральн шишлнг программар хойр минһн нәәмдгч жиләс авн кегджәнә. Ода деерән бәәрн әмтн зөөврин усар теткгджәнә. Любовь Шершнева уудг ус магазидт хулдж авчана. Энүнә тоолврар, иим усн эрүл-мендин халхд сән нилчән күргнә.

Любовь Шершневан келсәр, района һардачнр сән керг кежәнә. Сән чинртә уудг ус ик кезәнәс авн күләжәнә.

Октябрьск района администрацин толһач Санл Адьяевин келсәр, ода цаглань мөнгн ирсн кемд удл уга селәнә улсин гермүдт сән чинртә уудг усн ирх гиж лавлж келж болх. Хойр минһн арвн тавдгч жилд уудг усар Мирный болн Восход селәдин улс теткгдхмн. Селәнә эдл-ахусин һардачнрла болсн харһлтд тутрһ тәрдг эдл-ахусд тогтсн бәәдлин тускар күүндвр кегдв. Услврин ус олзлсна өрн ода тавн сай арслнгд күрв.

Санл Адьяевин келсәр, федеральн мөнгәр өггджәх усна кемжән ода деерән күртжәхш. Тутрһ урһалһна делгрлтин программар танһчин һардачнрин халхас мөнгнә дөн кергтә болжана.

Танһчин толһач Игорь Зотовин келсәр, танһчин правительствин халхас эн төр хаһлхин төлә дөн күрггдх. Федеральн мөнгн күртжәхш. Тегәд эн хурц төриг ахр болзгт халһхла сән болх.

Эн жил района тутрһчнр арвн зурһан минһн тонн тутрһин буудя хураж авсмн. Эннь хойр минһн арвн хойрдгч жиллә дүнцүлхлә, зөвәр баһ болжана. Тегәд иргч жилмдүт күцәх инвестиционн программ белдж авх шиидвр батлж авгдв. Иим программар тутрһин чекмуд болн цувгуд шинрүлж ясгдх зөвтә.

Ээнән Ольга, Максим Мятежный