Иим селвцә танһчин һардач бас бүрдәв

Олна малд хот белдлһнә көдлмш эн жил күнд таалд болжана. Танһчин зәрм фермерск эдл-ахус ниднкәс үвлд мууһар белджәнә. Кемр олна малас һару һархла ахлачнр засглда харһулгдхмн. Энүнә тускар эндр танһчин толһач Алексей Орлов зәнглв. Үвлин кемд белдврин көдлмшин йовудар тускар эндр цуг дааврта һардачнр болн арвн һурвн района ахлачнр танһчин толһачд тооца кев. Эндр өдрт танһчин социальн обьектмудас йирн һурвн процентнь дула өглһнә кемд белн болв. Техническе документац уга болад, ода дөрвн районд бичкдүдин сурһулин учрежденьс көдлмшт белн биш. Тер мет Элтс балһснд үвлин кемд белдлһнә көдлмш хашнгар кегджәнә. Ода Ставропольрегионгазд ик өрн цуглрв. Октябрин тавн күртл хотл балһсна цуг обьектмуд дула өглһнә кемд белн болх зөвтә гиж региона толһач неквр тәвв.