Худл зәнг шишлнг церглтсин көдлмшт боомтг учрана

Эн жилин эклцәс авн харсачнр нег минһн хойр зу дәкж һарч йовв. Эднәс хойр зун жирн зәнг худл болж һарв. МЧС-ин региональн заллтин зәнглсәр, әмтн бәәдг гермүдт түүмр шатсн худл зәнгәр бригадмуд нег сард долан-нәәмн дәкж һарч йовна. Дәкәд нег тодлад келхлә, худл зәнгәр шишлнг церглт дуудж авхла иим улсиг засгла харһулх закан бәәнә.

Шишлнг докьяһар түүмр унтрадг церглт нөкд болхар һарч йовжана. Дежурн әнгд һал орсн тускар зәнг орж ирв. Түүмр унтралһна церглтин һол күцлнь — улсиг болн эднә зөөр харсж авлһн. Болв түүмр унтралһна церглтин көдләчнрт болн талдан чигн шишлнг церглтин көдләчнрт худл зәнг ик көдлмш өгнә. Энүнә төлә дала цаг болн чидл кергтә. Орж ирсн зәнг худл аль угай зуг дор ормднь ирәд медж болх. Зәрмдән худл зәнгәр түүмр унтралһна, эмчнрин болн полицин бүкл бригадмуд һарч йовна.

Негдгч тойгта түүмр унтралһна әнгин харулин ахлач Олег Ланциновин келсәр, нег өдрт түүмр унтралһна церглт кесг дәкж һарч йовна. Тер тоод худл зәнгәр бас йовх кергтә. Эннь церглтин көдлмшт боомтг учрана. Мөнгн һарна, көдләчнрин көдлмшт му нилчән хальдана.

Диспетчерск церглтин көдләчнрин келсәр, нег селгәнд кесг худл зәнг орж ирнә. Одахн иим йовдл учрв. Нег залу хам-хоша бәәх герин һаза ута үзчкәд, түүмр унтралһна церглт дуудж авв. Хам-хоша бәәх улс хог-бог шатажасн бәәж нааран ирсн хөөн медгдв.

Пожарн залһлдана цутхлнг пунктын радиотелефонист Светлана Львован келсәр, түүмр унтралһна церглт тер дарунь ирәд түүмр унтрана. Зәрмдән худл зәнгәр һарч йовх кергтә болна. Нег күн хог-бог шатажасн бәәж. Зәрмдән һал эс орсн һазрт одх кергтә болна.

Ода Элст балһснд түүмр унтрадг тавн әнг бәәнә. Диспетчерск церглт олн әмтн дару-дарунь жиннүлнә. Нег өдртән һурвн зун күн жиннүлнә. Тер тоод худл зәнг бас орж ирнә. Эн жилин эклцәс авн хойр зун жирн худл зәнг ирв.

Пожарн халһлдана цутхлнг пунктын диспетчер Саглр Лукьянован келсәр, худл зәнг олар орж иржәнә. Нег үлү, сурһульчнр армлһнд бәәсн цагт. Альдас жиннүлжәхинь медж болна. Зуг телефонд сим-карт уга болхла энүг илткж болх. Кемр телефона тойгинь медж авхла, иим улсла саглулгч күүндвр кегднә.

Телефоһар худл зәнг тархадг улсла зуг саглулгч күүндвр кегдхш. Иим улсиг засгла харһулх закан бәәнә. Эдн нег минһн — күсдундур минһн арслнг ял өгх зөвтә. Терроризмин тускар худл зәнг тархахла эннь олна әәмшг уга бәәлһнә күнд кевәр зака эвдсн йовдл болжана. Иим худл зәнг предприятьмудын үүлдврт боомтг бюолна, худл зәнг тархагдна, олн әмтн үүмнә, цуг улсин бәәдл-жирһлин диг-даран эвдрнә. Эн жил танһчин дотр-дундын кергүдин органмуд иим нег йовдл итлкж авв.

Хальмг танһчар МВД-н барин церглтин көдләч Андрей Басхаевин келсәр, эн жилин февраль сард Лагань балһсана нег герт бомб бәәнә гисн зәнг орж ирв. Гер шинжлж хәләсн хөөн бомб олдсн уга. Тер дарунь жиннүлдсн күн илткгдв. Эннь хөрн йисн наста Лаганя бәәрн күн соктуһар жиннүлж. Ода эн йовдлар уголовн керг күцәгджәнә.

Иим кевәр зака эвдсн улс һурвн жилдән түүрмд суух засгла харһулгдх. Тегәд худл зәнг тархахин өмн, сәәнәр ухалтн.

Елена Алексенко, Котина Валерий