Хотл балһснд зөв-йосна органмудын команд мергнән йилһв, талдан чигн дөрлдән болв

Элст балһснд талдан чигн соньн марһас болв. Зөв-йосна органмудын элчнр хамгин мергнән йилһв. Эн марһан хальмг танһчар УФСБ-н заллтин шишлнг әнгин көдләч Владимир Манджиевин санлд нерәдгдв. Манджиев цергә даалһвран күцәж йовад әмнәсн хаһцсмн., урвн жил дарандан бүрдәгджәх дөрлдәнд региона зөв-йос харлһна органмудын элчнр дииләчән йилһв. Марһанд МВД-н полицин шишлнг отрядын, УИН-на федеральн церглтин, УФСБ-н болн наркоконтролин элчнр орлцад, мергән йилһв.

Элст балһснд армспортын хальмг танһчин чемпионат болх. Марһан «Двоеборье» системар дөрвн чиннүрин категорьт болх. Хойр дәкж шүүгдсн спортсмен цаарандан дөрлдшго. Тер мет күүкд улс бас дииләчән йилһхмн. Диилвр бәрсн спортсменмүд мана танһчин командын ханьд региональн болн федеральн дөрлдәнд орлцх зөв авхмн. Марһан ноябрин дөрвнд Октябрь кинотеатрт болх.

Элст балһснд грэпплингар танһчин чемпионат болв. Энүг хотл балһсна баһчудын комитет болн Хальмгин дзюдон, самбон федерац бүрдәж давулв. Эн бөк бәрлдлһәр Әрәсәд цөн жил хооран олн улс ноолдг болв. Энүнд самбон, дзюдон, классическ болн вольн янзар бөк бәрдлһнә, джиуджитцин эв-арһ орна. Грэпплингд бөкнр балл хоршахш. Эн арһар ноолдг улс өвдкүртә эв-арһ олзлад, диилвр бәрнә. Грэпплингин тренер Эсен Эсеновин келсәр, эн спорт йир соньн болн олз-туста. Энүнд балл олзлгго, ахр болхгт диилвр бәрх арһ бәәнә. Олн бөк бәрлдлһнәс авсн эв-арһ олзлхла туста болна гиж Эсен келнә.

Марһанд найн тавн күн долан чиннүрин категорьт дииләчән йилһв. Диилвр бәрсн бөкнр Әрәсән чемпионатд орлцх зөв авх. Хамгин сән өвдкүртә эв-арһ олзлсн Баатр Дошкатаев болн хамгин сән техник үзүлсн Эрдни Шалбуров шишлнг мөрәһәр ачлгдв. Хальмгин чемпион Эрднь Шалбуровин келсәр, ода мана танһчин бөкнр Әрәсән чемпионатд, нарта-делкән марһаст орлцхар зүткх зөвтә. Энд болхла бидн дамшлтан өөдүллж чадшговидн гиж Эрдни келнә.