Хошуда хурлын ясврин көдлмшт Элстин сурһульчнр дөн болжана

Нег минһн нәәмн зун арвн хойрдгч жилд Әрәсә Диилвр бәрсн хойр зун жилин өөнд нерәдгдсн керг-үүлдвр Хальмг танһчд болжана. Мана танһчин туужин болн сойлын мөнк зөөр болгч ик чинртә нег обьектд Астраханск областьд бәәх хурлд көдлмш кехәр баһчуд одв. Түрүн болж нааран Элст балһсна хөрдгч школын сурһульчнр ирв. Эдн Хошуда хурлын эргндк аһу хураж цеврлв. Энүнә хөөн бичкдүд экскурсь кеһәд, туужин кичәлд орлцв. Я гражданин нертә танһчин марһана призермудын орсн көвүд-күүкд Хурл харсхмн нертә социальн төсвд орлцжана. Иим кевәр баһчуд Хошуда хурлын ясврт олн улс оньг тусхах гиж санжана. Энүг хальмгин цергчнрин баатр зөөрмг дәәлдәнд нерәдж хйор зун жил хооран тосхсмн. Тер мет танһчин талдан чигн школмудын сурһульчнр эн керг-үүлдврт орлцх.