Хаврин тәрәнә көдлмш эклв
Зәнглһнә өдрин һол төр болж танһчин эдл-ахусд хаврин тәрәнә көдлмшт белдвр келһнә төр болв.
“Казачий” нертә эдл-ахун механизатормуд хамгин түрүнд хаврин тәрәнә көдлмшән эклв. Иим эрт кеер һарад көдлх таал эднд тенгрин бәәдл өгв. Района селәнә зәрм эдл-ахусд тәрәчнр хаврин тәрә тәрлһнә көдлмш эклхдән белн. Иргчдән дәкж киитршго тгиж эдн нәәлжәнә. Тегәд эрт буудян эк тәрхлә сән урһц авч болх гиж эдн тоолжана. Тер саамд специалистнрин тоолврар, аһаринг кемжән сольгдад, буудян урһцд му нилчән хальдах. “Казачий” нертә эдл-ахун директор Сергей Калода келсәр, намрин кемд хойр дундур минһн гектарт тәрән тәргдв. Ода машина тосн-түлән, хорн, бордвр хулдж авх кергтә.
Танһчин селәнә эдл-ахун министрин дарук Геннадий Рагозина келсәр, ода танһчин цуг эдл-ахусд хамгин һол күцл тәвгджәнә. Эннь давсн жилд хураж авсн му урһциг ода данцах кергтә. Эн хаврар мана танһчд хаврин тәрән далн негн минһн гектарт тәргдх зөвтә. Эн кемжән давсн жилсә невчк ик болжана. Келхд, района зәрм эдл-ахусд үвлин кемд үрсн намрин тәрәг дәкнәс тәрх кергтә. Эннь селәнә эдл-ахун көдләчнрт немр һару болжана. Давсн намрар болн үвлин кемд хур-цасн баһар орад, һазрт чиг сәәнәр ивтрсн уга.
Танһчин селәнә эдл-ахун министрин дарук Геннадий Рагозина келсәр, намрин тәрәнә бәәдл ода дегд сән биш. Дөчн минһн гектарт тәрән мууһар һарв. Тегәд хаврин тәрәнә аһу икдх. Эн жил зун далн минһн гектарт буудян эк тәрх кергтә. Ут-тоодан тәрәнә аһу хойр зун тавн минһн гектар эзлх зөвтә.
Тер бийнь хаврин көдлмш күцәлһнд боомтг бәәв чигн, тер тоод хамгин ик зовлнгнь мөнгн ховр болв чигн, мана танһчд хаврин тәрәнә көдлмшиг цаглань күцәх зура бәәнә. Энүнә тускар зәнглһнә өдрт орлцсн һардачнр келв. Әрәсә нарта-делкән хулд-гүүлгәнә организацд орсна хөөн, селәнә эдл-ахуг дөннжәсн зәрм халх зогсагдв. Тер тоод һазрин бордврин, машина тосн-түләнә банкин өгья мөнгнә процентн кемжәнә данцалһна мөнгн ода өггджәхш. Энүнә ормд тәрәнә һазрин нег гектар олзлһна төлә данцалһна мөнгн өггдх. Танһчин селәнә эдл-ахун министрин дарук Геннадий Рагозина келсәр, нег гектарт эдл-аху хөрн тавн арслнг авх. Давсн жилин тәрәнә аһуһас иштә эдл-аху дөнцл мөнг авх зөвтә. Иим тооһар мөнгн ирх. Талдан мөнгиг жилин көдлмшин ашар өгх зура бәәнә.
Тегәд ода селәнә эдл-ахус иим мөнг государтсвас күләжәнә. Эн мөнгәр машина тос-түлә, буудян эк хулдж авх кергтә, тәрәнә техник ясж белдж авх кергтә. Эн көдлмшин тохнятаһар кехлә, буудян иргч урһц чигн сән болх.
Ээнән Ольга, Очра Сергей
