Харба селәнд санлын эрсн секгдв

Үстин района Харба селәнд хальмг улсиг цаажла харһулсн далдгч жилин һашута өөнд нерәдж санлын эрс секв. Харба селәнәс тууврт бәәсн нег минһн күүнә нер мөнкрүлхин төлә иим эрсн тәвгдв. Энүнд декабрин зөрн нәәмнд цаажла харһсн улсин нерд бичәтә.

Санлын эрс секлһнд Харба селәнд өсж боссн кесг әмтн цуглрв. Эднә зәрмнь ик хол һазрас ирв. Элстә Цаһан-Амнас, Астраханск областяс. Сиврин тууврт бәәһәд әмнәсн хаһцсн өөрхн улсин болн элгн-садна нердиг мөнкрүлхин туск зәнг сонсчкад бәәрн улс байрлв. Санлын эрм тосхлһна седәриг эдн цугтан дөннв. Свирт нүүлһсн улсин нер-ус диглж авлһна кергт эдн шунмһаһар орлцв. Нег сарин эргцд харбинцнрин нег минһн шаху нерд бичгдж авгдв.

Бүрдәмжин комитетин гешүн Татьяна Мухараеван келсәр, иим санлын эрс секлһнә седвәриг цуг әмт дөннв. Ахр болзгт тууврт бәәсн улсин нерд цуглулж авч чадв.

Санлын эрс тосхлһна седвәриг Харба селәнә улс татсмн. Ахр болзгт эдн сансн санаһар болн күцлән бәәдл-жирлһд тохраж чадв. Энүг хальмг улсиг цаажла харһулсн далдгч жилин һашута өөнд нерәдв. Эннь бәәрн улсин тоолврар темдгтә болн учрта йовдл болжана.

Харба СПК-н ахлач Игорь Цереновин келсәр, иим керг күцәснд селәнә цуг улсин ач-тус бәәнә. Энүнд арһлачнр, малчнр болн талдан чигн эн селәнд урднь бәәсн улс дөн болв.

Ода санлын эрсн селәнә тал дунд ик холас дүнгәж үзгднә. Энүнд зун жирн өрк-бүл бәәршлжәнә. Өрк-бүл болһнд дөчн һурвдгч жилин декабрин хөрн нәәмнд туувр бәәсн улс бәәнә. Эврәннь өөрхн улсин нерд олж авсн дунд Екатерина Нохашкиева йовна.

Дөчн һурвдгч жиләс авн тәвн зурһадгч жил күртл нег минһн Харба селәнә улс тууврт бәәсмн. Энд тәвгдсн санлын эрснд эднә цуг нерд орсн уга болх. Эднә списк бичлһнә көдлмш цаарандан кегджәнә. Хол киитн һазрт әмнәсн хаһцсн улсин санлыг нег минутд тагчг бәәһәд тодлв.

Үстин района Харба селәнд тәвгдсн санлын эрсн хальмг улсин туужин һашута халхин тускар иргч үйнрт дәкәд нег тодлулжана. Иргчдән нааран олн әмтн ирәд, киитн Сиврт әмнәсн хаһцсн улсин санл тодлх.

Көкән Герл, Хавтхна Анатолий