Хамгин сән участкин полицин көдләч шүүж авгдх
Эндр “Народный участковый” марһана региональн девснгин дииләч медгдх. Энүнд танһчин райодас болн Элст балһснас арвн нәәмн участкин полицин көдләчнр орлцв. Дууһан өглһн интернетын дөнгәр кегдв. Урдаснь кесн то-дигәр Лагань балһсна полицин көдләч Баатр Саккаев нүүрт йовна. Кемр диилвр бәрхлә. Баатр цаарандан федеральн девснгд дөрлдх.
Лаганьд энүг цугтан меднә. Энд төрж боссн күн. Спортд дурта, оньдин дигтә-дарата болн чанһ-чиирг. Тегәд чигн цергәс бууж ирсн хөөн Баатр Саккаев милицин школд орад сурв. Цөн жилд дамшлт зөв-йосна органмудт хоршаһад төрскн һазртан хәрж ирв. Улсин әәмшг уга бәәдл харж хәләдг участкин көдләчнр тиигхд ховр билә. Энүг участкин полицин көдләчд шиидснь бәәрн улсиг байрлулв. Эн көдлмшт арвн жилдән көдлжәнә.
Лагань балһсна бәәрн күн Андрей Оскановин келсәр, школан төгсәсн хөөн нег жил болад Баатр Алексеевичиг участкин полицин көдләчин үүлд шиидв. Тер цагас энүг меднә. Күнд болхла Саккаевд ирәд, дөн күргхинь сурна.
Көдлмшин өдр әдл болхш. Зәрмдән полицин участкт ик чеерүд цуглрна. Болв участкин полицин көдләч эврән әмтн тал одна. Саккаевин бүртклһнд дөрвн минһн күн бәәх микрорайон бәәнә. Эннь Лаганьд хамгин ик район болжана. Эндр бәәрн улсин жиннүлсн зәнгәр һарч йовв. Зерлг нохас амр өгчәхш гиж нег герин эздүд зәнг өгсн бәәж. Иим нохас әәмшг учражан гиж эдн келнә. Лаганя бәәрн күн Лузаевин келсәр, зерлг нохас йоста дәәсн болжана.
Участкин полицин көдләч Баатр Саккаевин келсәр, балһсна һардачнрт болн коммунхозин ахлачнрт энүнә тускар зәнглх. Нохас бәрж авдг улс ирәд, эн төр хаһлх зөвтә.
Ирсн саамд участкин полицин көдләч талдан гермүдин улсла харһад күүндхәр шиидв. Энд хурц төрмүд уга. Наркоманмудла болн олсн ноһа цуглулад хулджах әмтнлә ноолда кежәх полицин көдләчнрт бәәрн улс ханлтан өргв. Сүл цагт иим йовдлмудын то баһрв.
Участкин полицин көдләч Баатр Саккаевин келсәр, талдан регионмудас, Элст балһснас, Әәдрхнәс әмтн ирәд олсн ноһа цуглулж авна. Энүг бйиннь төлә цуглуж авчанавидн гиж келнә. Эн залу күүнә келсәр, Саккаев бийән сән халхас үзүлв. Цугтан энүг меднә. Ода микрорайнд бәәдл төвкнүн болв.
Саккаевин тодлсар, экләд көдлсн түрүн жилмүдт участкт бәәдл хурц билә. Оньдин ноолдан, цүүгән, хулха келһн, әрк уулһн һардг бәәсмн. Йовдл болһниг шинжләд, учринь медж авдг бәәж. Эн туст саглулгч көдлмш кех кергтә гиж Баатр шиидв. Хамгин түрүнд школмудла залһлда бәрж көдлх кергтә. Сурһульчнрла өдгә цагин хурц төрмүдәр күүндвр, үүдәгч марһас талдан чигн керг-үүлдврмүд олз-тустта болв. Эндр өдрт насни дигт күрәд уга бичкдүдин кергүдин комиссин тоод зуг хойр сурһульч бәәнә. Эдн жирһлин күнд бәәдлд туссн өрк-бүлмүдин бичкдүд хулха кеһәд бәргдж. Полицин көдләчин келсәр, эдн гемән медәд, бийән бурушав.
Школын директорин дарук келсәр, лаганцнр Саккаевиг күндлнә. Сурһульчнр дунд чигн бас тоомсрта күн. Школас энүг дуудхла, тер дарунь күрч ирнә. Төвкнүн кевәр цуг төрмүдиг хамдан хаһлна.
Дәкәд болхла Баатр Саккаевин участкт күнд кевәр зака эвдсн йовдл учрсн уга. Эннь полицин көдләчин цергә үүлдврт ик чинртә үзмж болна. Тегәд чигн лаганцнр эврәннь участкин полицин көдләчин төлә дууһан өгчәнә. Әрәсән МВД-н зарлсн марһанд олн-әмтнә участкин хамгин сән көдләчин нер зүүхәр Баатр дөрлджәнә. Региональн девснгд интернетар дамжулад дууһан өглһнә марһанд саакаев нүүрт һарв. Цааранднь федеральн девснгин дөрлдән болх. Энүнә ашар Әрәсән хамгин сән көдләч шүүж авгдх. Энүнд "Народный участковый" нерн зүүлһгдх.
Чучян Валентина, Очра Сергей
