Хамгин сән сурһульчнрт мөрә болн диплом бәрүлж өггдв
Элст балһсна школмудын арвн сурһульч хотл балһсна мэрийн мөрәһәр ачлгдв. Иим мөрә сурһулин жилин ашар бәрүлж өггднә. Иим марһан “Эрдм-сурһуль” нертә келн-улсин төсвәр долан жил хооран эклсмн.
Арвн негдгч классин сурһульч Марат Меджидов бичкн цагасн авн спортд дурта. Гимнастикин, боксин болн футболын секцд одв. Болв греко-римск янзар бөк бәрлдлһнд хамгин ик дуран өгв. Ода эн билгтә көвүн цугәрәсән болн нарта-делкән олн-зүсн марһаст диилвр бәрв. Тер мет гүн медрлән кесг олимпиадт үзүлв.Спортла дегц Марат химин предметд йир дурта. Элст балһсна арвн хойрдгч школын сурһульч Марат Меджижовин келсәр, мини багш йир сән гүн медрлтә специалист. Түрүн кичәләс авн таасгдв. Боктаева Галина Дорджиевна. Ик ханлт өргжәнәв. Түрүн кичәләс авн нанд онц оньг өгәд, сурһв. Гүн медрл өгхин төлә ик көдлмш багш күцәв. Тегәд ик ханлтан өргжәнәв багшдан.
Марһана комиссин ханьд орсн профсоюзмудын элчнр болн педагогическ күч-көлснә ветеранмуд дииләчиг шүүж авхд күнд болна.Иим мөрә авх билгтә көвүд-күүкд Элст балһснд олн бәәж. Комиссин шиидврәр, сурһульдан болн олна көдлмшт сән күцәмж бәрсн арвн сурһульч мөрәһәр ачлгдв. Арвн тавдгч школын сурһульч Вилетта Колмакова “Лучшая женская роль” номинацд диилвр бәрв. Эн күүкн төрскн һазрин тууж болн солй сәәнәр меднә. Энүнә үүдәсн программ нүднә харань му бичкдүдт дөн болх. Виолеттан келсәр, тактильн дегтрмүд болн дөнцл материалмуд кед һарһвидн. Орс болн хальмг келәр, цугинь эврәннь һаран келәвидн. Мөнгиг сурһульчнрин кегдлмүд яармд хулдад хоршаж авлавидн гиж Виолетта келнә.
Билгтә көвүд-күүкд олн зүсн эрдмәр соньмсж, гүн медрл авчана. Келхд, Майя Бадмаева номин болн дамшлтын конференцин эсвин болн һазадын ордудын филологин секцд хамгин сән төсв белдв. Мария Бадаева болхла, китд кел сәәнәр дассн деерән, билгтә зурач. Эсвин гүн медрлтә Бадм Дорджиев цугәрәсән олимпиадт оньдин сән күцәмж бәрнә. Давсн жилд обшествознание предметар бас сән үзмж бәрәд, призермудын тоод орв. Москван физико-техническ институтын медлд бәәх физико-техническ школын сурһульч Бова Эрендженов зурачнрин марһаст диилвр бәрнә.
Эн көвүд-күүкд олн-зүсн халхар гүн медрл авад, спортан соньсмжана, олан бәәдл-жирһлд бас шунмһаһар орлцжана. Иим билгтә Элстин сурһульчнр мана танһчин йоста бахмж болж, эдниг хамдан сурчасн көвүд-күүкд күндлж, үлгүр авчана. Иргчдән билгтә баһчуд мана танчһин цецгәрлтд эврә тәвцән орулхнь лавта.
Хавтхна Элла, Жамбин Дмитрий
