Хальмгин университетд номтнр цол харсжана
Хальмгин государственн университет номин көдләчнриг белдлһнә цутхлнг болв. Диссертационн хүүв кесг аспирантнрт номин цол зүүлһв. Деед аттестационн комиссь эднә орулж өгсн нег чигн көдлмш хәр илгәсн уга. Арвн жилин эргцд диссертаицонн хүү нанй күүнд номин цол зүүлһж. Эн өдрмүдт номин цол харссн улс номин гүн шинжлт кеһәд, сән медрл хоршасан болн ик дамшлт авсан медүлв.
Людмила Ефимова Якутск балһснас ирж. Номин кандидат Дорд-ар үзгин федеральн университетд багшлжана. Докторск диссертациг Хальмгин государственн университетд харсхар шиидв. Энд бәәх фиольклористикин болн монһл келнә дииссертационн хүүв Әрәсәд ор һанцхн болжана. Темдглж авсн көдлмшән олн жилдән күцәв. Ефиомован тоолврар, диссертационн хүүвин гешүдин сурврмудт номт ямаран хәрү өгсинь шинжлхлә, көдлмшиг эврән кеж аль угай медж болх. Энүнә тоолврар, тодрха шинжлтын көдлмш болн номин үүлдврин дамшлт шүүж авсн көдлмшиг кехд сән нилчән күргжәнә.
Номин кандидат Людмила Ефимован келсәр, йир соньн сурврмуд өггдв. Зәрмнь күнд болв. Иим хәрлцән соньн болна. Якут улсин амн үгин зөөрт иим оньг өгснь таасгдв. Якут улсин амн үгин зөөрин төрәр диссертац харсв. Иим хүүв уга болсн болхла, диссертац хардсг һазр дәкж уга. Нег үлү фольклорин төрәр.
Әрәсән номин академин кел шинжлһнә институтын ах номин көдләч, деед аттестационн комиссин шинжләч Григорий Пюрбеевин келсәр, хүүвин гешүдин оньгт тусхагдсн цуг көдлмшәс нег чигн чигн шинжлт хәрү өггдсн уга. Энүнд Москван, Санкт-Петербургин болн Хальмг танһчин номтнр көдлмшән харсжана. Эннь университетин хүүвин чанһ некврин болн өөдән мергжлтин герч болжана. Эн өдрмүдт харссн цуг диссертацин көдлмш ик чинр зүүжәнә, номин халхар соньн болжана.
Деед аттестационн комиссин шинжләч Григорий Пюрбеевин келсәр, хәләгдсн көдлмш өөдәнәр үнлгдв. Иим көдлмш түрүн болж орулж өггджәнә. Номтнр олн келн улсин келәр, тер тоод тһрк, монһл, бурят, хальмг келәр шинжлт кежәнә. Энүнд ик төрмүд босхгджана. Номин цол амрар зүүлһгдхш. Сән күцәмж бәрснь ил үзгдв. Хүүвин гешүд чик үнлһ кеж.
Арвн жилин эргцд диссертационн хүүв найн күүнд номин цол зүүлһв. Сүл хойр өдрин эргцд көдлмшән харссн улсин көдлмшт номин гүн шинжлт кегдсн медгдв, ик дамшлт хоршаснь үзгдв, сән медрл олзлснь үзгдв гиж Хальмгин университетин проректор Владимир Имеев темдглв.
Хальмгин университетин проректор Владимир Имеевин келсәр, арвн жилин эргцд хүүвин кеж-күцәсн көдлмш дала. Ода университетин хүүвиг цуг Әрәсәд меднә. Иим керг-үүлдврмүд Хальмгин университетин чинр өөдлүлнә. Тер тоод Өмн үзгин деед сурһуль дунд мана университетин нерн туурулгджана. Хүүвин тускар келхлә, ода иим хүүв Әрәсәд дегд ховр болжана.
Хальмгин государственн университетд номин цол харсх улсин то жил ирвәс өсәд йовна. Эннь мана деед сурһулин өөдән чинрин герч болжана. Тер мет мана танһчин деед сурһульд номин цол харсхар Әрәсән олн регионмудас болн һазадын ордудас номтнр иржәнә. Тер тоод Бурятас, Якутяс, Монһлас, Горный Алтайяс болн Дагестанас номтнр иржәнә.
Ээнән Ольга, Эрнжәнә Эрднь
