Хальмгин университет Өмн үзгин деед сурһулин нүүрт йовна

Әрәсән эрдм-сурһулин болн номин министерств Хальмгин университетиг хамгин сән деед сурһулин тоод орулв. Иим спискд мана орн-нутгин нертә деед сурһуль орж чадсн уга. Келхд, хальмгин государственн университет хойрдад иим шинжлтд сән үзмжтәһәр оржана. Хальмгин деед сурһуль Өмн үзгин федеральн округин деед сурһулин нүүрт йовна. Эн жил шинжлт шин кемжәһәр кегдв.

Әрәсән эрдм-сурһулин болн номин министерств деед сурһулин үүлдвриг зурһан кемжәһәр шинжлж үнлв. Эннь абитуриентрин ЕГЭ-н шүүврин дунд балл, номин болн шинжлһнә көдлмшт йовулгдсн мөнгнә кемжән, һазадын ордудын оютнрин то, деед сурһулин внебюджтен үүлдвр, сурһулин болн номин хорасин аһу, нег оютын тоод инфраструктурин бәәдл тоод авгдв. Эн жил дәкәд нег кемжән тоод авгдв. Эннь деед сурһуль төгсәсн баһчуд көдлмшәр тетклһн. Эн туст хальмгин университет шишлнг көдлмш күцәжәнә. Энүнә төлә танһчин болн хам-хоша бәәх регионмудын, Ставропольск крайин, Саратовск болн Московск областьмудын предприятьмудла хамцу көдлмш сән ашта болжана. Ректор Салаевин келсәр, эн халхар олз-туста көдлмш күцәгджәнә.

Университет төгсәсн Виталий Эрдниев дамшлт өөдлүлснә хөөн, эврәннь деед сурһульд инновационн-шинжлтын әнгд үлдәд көдлжәнә. Одахн Москва балһснд эрдмин халхар сурһуль төгсәв. Хальмгин университетин оютнр болн багншр олн-зүсн төсв күцәжәнә. Энүнә ашт эдн олн мөнгнә мөрә шүүж авв, Эн мөнгәр эврәннь ухан-санаһан бәәдл-жирһлд тохраж болх.

Университетин ах специалист Виталий Эрднеевин келсәр, иим көдлмш ик чинртә. Эврәннь шинжлтын ашт производств секж болх, тиигхлә мөнг олх арһ бәәнә.

Деед сурһулин сән көдлмшин нег үзмжнь — һазадын ордудын оютнрт сурһуль өглһн болжана. Ода Хальмгин университетд Африкин орн-нутгудас, Китдәс, Монһлас, Германяс баһчуд ирж сурһуль дасжана. Ут-тоодан һурвн зун көвүд-күүкд, Таджикистанас ирсн Иззат Шарипов хальмгин университетд деед сурһуль дасхар шиидв. Нег жилин эргцд орс кел дасж авв, хамгин сән оютнрин тоод оржана. Энд цугнь таасгджана, сурһулин систем, обшежитин бәәцин таал, теегин цевр аһар таасгдв.

Оют Иззат Шариповин келсәр, энд сән сурһуль дасх арһ бәәнә. Авсн медрлән төрскн һазртан олзлх кергтә. Иргч жилд Таджикистанас дәкәд аврн тавн баһчуд ирж сурх, хальмгт сурһуль дасхд цуг таал бәәнә. Әмтн сән, цугнь таасгджана.

Оютнрин төлә деед сурһуль цуг таал бүрдәгдв. Номин лабораторьт өдгә цагин оборудованяр оютнр цуг кергтә шинжлт кеж чаджана. Университетд авсн медрлиг эдн дамшлтар батрулжана. Зәрм оютнр производственн дамшлтан мана танһчд болн һазадын ордудт өөдлүлжәнә.

Инженерн-технолгическ факультетин декан Павел Чимидовин келсәр, иим лабораторь комплексн болжана. Энүг кесн кафедрин улд бүрдәв. Оютнр авсн медрлән иим лабораторь ирәд, бүрткж чадх.

Эн жил болсн шинжлтд Әрәсән нег минһн тәвн дөрвн деед сурһуль болн эднә филиалмуд, тер тоод дөрвн зун найн негосударственн деед сурһуль орв. Өмн үзгин федеральн округд арвн дөрвн деед сурһулин үүлдвр му гиж үнлгдв. Шинжлтын түрүн ашиар зун һучн зурһан сурһулин заведень му чинртә эрдм-сурһуль өгчәнә гиж шиидгдв. Эн спискд Әрәсән нертә деед сурһуль йовна. Хальмгин университет болхла цуг кемжәнлә ирлцжәнә гиж тоолгдв. Ректор Бадм Салаевин келсәр, эннь багшнрин коллективин көдлмшин аш болжана. Иим шинжлтын йовудт эврәннь дуту-дундсан медж авхд сән болна. Энүг чикләд көдлхд сән нилчән күргнә.

Эндр хальмгин университетин һардачнр Санкт-петербург балһснд одад, дарани ачлвр авч ирх. Нарта-делкән оютнрин форумин ашар Әрәсән арвн зурһан деед сурһуль хамгин сән гиж үнлгдв, тер тоод Хальмгин государственн университет бас йовна. Ачлвр бәрүлж өглһнә керг-үүлдврт эрдм-сурһулин федеральн министр орлцх.

Ээнән Ольга, Котина Валерий