Хальмгин сурһульчнр диилвр бәрв

Хальмгин спортсменмүд нүүрлгч орм эзлв. Ейск балһснд эрдм-сурһулин учрежденьсин дунд мини-футбольн марһан болв. Эн дөрлдән Мини-футбол — в школу нертә цугәрәсән программар бүрдәж давулгдв. Мана танһчас марһанд дөрвдгч школын сурһульчнр орлцв.

Эн зургудт дииләчнриг ачлжах кем үзүлгджәнә. Тер тоод Хальмгин коллектив бас ачлгдв. Иим диилвр бәрхин төлә көвүд кесг жилдән белдвр кесмн. Давсн жилд эдн һурвдгч орм эзлв. Эн саамд болхла зуг түрүн орм эзлхәр зүткв. Командын футболистнр ни-негн кевәр наадад, диилвр бәрхәр зүткж дөрлдв. Футбол наадар эдн бичкнәсн авн соньмсжана. Школдан йилһән сәәнәр сурдг командын дәврәч Алдр Горяев эврәннь эцк Мергн Горяевин хаалһар йовхар шиидв. Энүнә эцкнт ода күртл дурта наадан хайжахш. Энүнә тоолврар, мини-футбол иргчин хаалһ болжана.

Алдр Горяевин эцк Мергн Горяевин келсәр, өдгә цагин бичкдүд нурһлж компьютерар соньмсжана, һаза аля-азд көөнә. Тегәд эврәннь көвүндән эрүл-дорул бәәдг авьяс дасхжана. Энүнә нәәжнрнь бас спортсменмүд. Эдн хоорндан ни-негн бәәнә. Спорт бичкдүдин занг батрулхд сән нилчән күргнә. Иргчдән эднд спорт дөн болх.

Школын команд Булһар мяч танһчин марһана кесг дам дииләчнр, Элст балһсна чемпион, мини-футбольн цугәрәсән марһасин призермуд. Эн турнрирт школын коллектив эврәнь белдврән үзүлж чадв.

Ким Сангаджиевин келсәр, марhанд сән команд орлцв. Наадн йир күнд зүткәтә болв. Алксандр Жгировин келсәр, Дагестана командла наадхд хамгин күнд болв. Волгоград балһсна футболистнрла бас наадн зүткәтә болв. Эн нааднд диилвр бәрсн команд цаарандан дөрлдх зөв авла. Тегәд эдн диилвр бәрж чадв. Иван Селюковин келсәр, товчлгч наадн хамгин күнд болв. Нег гол икәр цокж орулад диилв. Диилвр бәрсндән икәр байрлв. Алдр Горяевин темдглсәр, футбол энтн спорт болжана. Энтн мана жирһл. Тохнята белдвр кеһәд Москвад диилвр бәрх санан бәәнә.

Өмн үзгин болн Ар Кавказин федеральн округст мана футболитснр хамги н сән наад үзүлв гид трнер Николай Шогдинов келнә. Цуг харһлтс зүткәтә болв. Наадна сүл минутд Элстин көвүд Волгоград балһсна командыг диилж чадв. Эдн 2:0 тооһар диилвр бәрәд, зональн девснгин дииләчин нер зүүв. Марһана бүрдәһәчнрин келсәр, иим дөрлдәнә һол күцлнь — эрдм-сурһулин хамгин сән гисн учреждень йилһж авсн деерән, Мини футбол — в школу нертә программиг регионмудт тархаж делгрүлһн болжана. Тер мет бичкдүд дунд физическ культур болн спорт тархалһна төр хаһлгджана.

Тренер Николай Шогдиновин келсәр, Волгоград балһсна командла наадн йир күнд болн зүткәтә болв. Түрүләд хальмгин футболитснр гол цокж орулв. Энүнә хөөн иим то кесгтән бәәв. Зуг нег минут үлдсн кемд дәкәд нег гол цокж орулж чадв. Көвүд бүрдәмжтә кевәр наадв, нег негән дөннәд, ни-негн коллектив болж наадла. Көвүд наадн болһнд цуг чидлән агсж наадв.

Ода хальмгин уйн наста футболистнр Өмн үзгин федеральн округин нер цугәрәсән марһанд харсх. Эн турнир Москва балһснд мартын чилгчәр болх. Ода болхла школын команд тохнята белдвр кежәнә. Иим кевәр сән дамшлт хоршаһад эрк биш диилвр бәрхә күцл эдн өмнән тәвжәнә.

Ээнән Делгр, Хулхачин Николай