Хальмгин спортсменк цаһан мөнгн медаль шүүж авв
Хальмг танһчин спортсменк бүс бәрәд бөк бәрлдлһнә нарта-делкән чемпионатд цаһан мөнгн медаль шүүж авв. Эндр танһчин правительствин ахлач Игорь Зотов иим өөдән спортивн күцәмж бәрсн баһ наста спортсменк Елизавета Жигачеваг йөрәһәд, Әрәсән спортын мастерин цол зүүлһснә темдг бәрүлж өгв. Елизавета арвн хойр жилдән спортар соньмсжана. Хойр минһн йисдгч жиләс авн тренер Эрнцн Авлаевин һардврт бөк бәрлдлһнә эрдмәр көдлжәнә. Танһчин марһана кесг дам дииләч, межрегиональн дөрлдәнд диилвр бәрсмн, хойр минһн арвн хойрдгч жилин Әрәсән чемпионатын призер. Елизавета Жигачева Әрәсән баһчудын командын ханьд Карачаево-Черкессьт болсн бүс бәрәд бөк бәрлдлһнә нарта-делкән чемпионатд цаһан мөнгн медаль шүүж авла. Тәвн хойр килограммин чиннүрт Башкирин бөкд мана спортсменк зуг нег балл шүүгдв. Келхд, эндр Елизавета хөрн нас зүүв. Һарсн өдрләнь болн сән күцәмж бәрснләнь энүг йөрәжәнәвидн.
