Хальмгин оютн алдр фильмд орлцв
Советск Союзин улсин хамгин дурта режиссер, сценарист, актер болн СССР-ин олн-әмтнә артист Леонид Гайдай эн жил йирн нас зүүх бәәсмн. Ильф болн Петровин романар энүнә цокж авсн Двенадцать стульев нертә фильмиг олн улс дурлж хәләнә. Эн шог наадн дөчн жил хооран цокж авгдла. Энүнд Хальмгин университетин багш Елена Микитенко бас орлцсмн. Тиигхд Елена деед сурһульд сурчала.
Фильмиг далдгч жилмүдт цокж авла. Тер цагт Елена Микитенко Пятигорск балһсна педагогическ институтд һазадын келнә факультетд сурчасмн. Леонид Гайдайин үүдәчг баг ирснь энүнд болн талдан чигн баһчудт ик чинртә йовдл болв. Елена Ивановна тодлсар, советск Союзин кинон оддудыг Сергей Филипповиг, Михаил Пуговкиниг, Арчил Гомиашвили, Юрий Никулиниг үзхд, нер туурсн режиссерин көдлмш хәләхд йир соньн болн өвәрц билә. Тегәд чигн статистнрин багд бичүлгдв. Кино цокж авсн һурвн өдриг ода күртл сәәнәр тодлна. Иим йовдл энүнә зүркнд мөнкинд төөнрж үлдв. Елена Микитенко келсәр, уульнцар талдан улсла хамдан йовх даалһвр бәәж. Болв баһ наста күүкн йовж йовад, Гайдай тал хәләсн бәәж. Тадн һоодан йовх зөвтә биләт, тадн болхла эврән дүр нааджах әдл йовлавт гиж режиссер келж.
Леоинд Гайдайин цокж авсн Двенадцать стульев нертә фильм далн негдгч жилд экранд һарв. Хүвсхлин цагт болн энүнә хөөн тогтсн дәәнә коммунизмин кемд олн әмтнд үнтә зөөрән бултулдг бәәж. Эврәннь үнтә зөөрән арвн хойрас нег сандлд бултулсн тускар өнгржәх хадм экәсн Ипполит Матвеевич Воробьянинов медв. Энүнә хөөн, цуг кергән хайчкад, Воробьянинов сандлмуд хәәнә. Энүнд баһ наста мекч күн, алдр комбинатор Остап Бендер нөкд болад, зәрм зөөринь авхар седнә.
Елена Микитенко тодлсар, кинод билгтә актермуд наадв. Эдн йилһән сәәнәр дүрмүдән үзүлв, режиссерин өгсн цуг даалһвриг күцәв. Зәрмдән нег эпизодыг кесг дәкж цокж авла. Тиигхд статист улст һурвн арслнг өгдг бәәж. Эннь йир ик мөнгн болдг билә.
Пятигорск балһснд амрчах улсас Воробьянинов һууль һуужана. Цаһан хувцта болн толһадан берет өмссн күүкн эннь Елена Микитенко. Хөөннь артистк болсн уга. Дөчн жилдән Хальмгин университетд багшлв. Двенадцать стульев фильмд багшнь нег эпизодт цокж авгдсна тускар эдн түрүн болж сонсад, икәр өврв. Мана багш иим алдр фильмд цокж авгдсна тускар урднь сонсад уга бәәж. Эннь йир өвәрц болв.
Елена Микитенко келсәр, фильмд нег экпизодт орлцсн йовдл энүнә бәәдл-жирһлд йоста ончта йовдл болж үлдв. Ода болхла нег эпизодт цокж авгдснь бийнь иим йовдл туужлгч гиж келж болх. Алдр шог нааднд орлцсндан ик байрта бәәнә. Тер цагин зургудыг ода күртл әрүнәр хадһлжана. Болв эн фильмиг дискд бичж авч чаджахш. Леоинд Гайдайин йирн жилин өөнлә ирлцүлж үзүлсн кинод дәкнәс бийән хәләж чадв.
Ээнән Делгр, Колдан Церн
