Хальмгин келн-улсин театрт шин наадна түрүн үзүлвр болв

Баснга Баатрин нертә Хальмгин келн-улсин театрт Балакан Алексейин бичсн "Зарһим эврән кетн" наадна түрүн үзүлвр болв. Танһчин сценд иим наадн түрүн болж тәвгджәнә. Спектакльд Бальжирман һол дүриг театрин артистк Марина Кикеева нааджана. Соньн наадыг энүнә өөрхн улснь, элгн-саднь болн хамдан көдлжәх артистнр ик оньган өгч хәләв.

Баснга Баатрин нертә хальмгин келн-улсин театрт Балакан Алексейин бичсн "Зарһим эврән кетн" наадна түрүн үзүлвр болв. Энүг хәләһәчнр ик кезәнәс авн күләжәсмн. Бальджирман һол дүриг баһ наста артистк Марина Кикеева нааджана. Энүнә үүдәлтин хаалһд иим наадн түрүн болж харһжана. Шин нааднд артистк һанцхарн наадна. Артистк Марина Кикееван келсәр, наадн эклтл цөн цаг үлдв. Икәр үүмжәнәв. Болв энүг хәләһәчнр үзх зөв уга. Бийән һартан авад, ирсн улсин сән наадар барлулх саната.

Тер мет Марина Кикеевала әдл театрин режиссер бас икәр үүмв. Сергей Бурлаченкон келсәр, түүк умшсна хөөн энүнд Бальджирман һол дүриг кен наадхнь медгдв. Балакан Алексейин бичсн наадн соньн болсн деерән, гүн учр-утхта. Тегәд наад тәвхин төлә шин эв-арһ хәәж авх кергтә болв, пьесин ке-сәәхнинь үзүлх күцл тәвгдв. Режиссер Сергей Бурлаченкон келсәр, эврәннь жирлһин хаалһдан бидн зәрмдән ухаллго эндү йовдлмуд һарһнавидн. Эн туужиг Марина Кикеевала хамдан хәләһәчнр келж өгх зура тәвгдсмн. Иим йовдл һарһсна хөөн, бидн бийән гемшәһәд, зованавидн. Иим хажһр йовдл һархинь өмн сәәнәр ухалх кергтә гисн уха-серл мана наадн орулжана.

Шин наад хәләхәр Балакан Алексейин авальнь Цаһансар ирв. иим спектаклиг дутаж чадсн уга. Кесг жилдән Балакан Алексейд дөн-түшг болж йовсмн.

Тер мет шин наад хәләхәр бичәчин элгн-саднь, өөрхн улснь болн энүнә үүдәлтд дурта әмтн олар ирв. Тер тоод Наталья Санжаревская. Театрт дуртав, соньн наад хәләхлә чееж сергнә гиж күүкд күн келнә. Дарук сард Элст балһсна театрмуд Балакан Алексейин найн тавн жилин өөнд нерәдгдсн региональн фестивальд орлцхмн.

Ээнән Делгр, Настан Сергей