Хальмгин институт алтн медаляр ачлгдв
Селәнә эдл-ахун номин шинжлт кедг хальмгин институт Москва балһснд болсн Алтн намр нертә цугәрәсән агропромышленн һәәхүлин алтн медаляр болн дипломар ачлгдв. Мана региона номтнр Хальмгт шин тохма мал һарһлһнд ик тәвц орулсн төләд иим өөдән ачлврар мөрәлгдв.
Селәнә эдл-ахун номин шинжлт кедг Хальмгин институт кесг жилдән мал өсклһнә, ветеринарийн, һазрин, буудян экин болн малын хот белдлһнә халхар шинжлт кежәнә, экономикин болн инновацин тускар шинжлт бас күцәжәнә. Эднә кесн шинжлтс Хальмг танһчин болн талдан чигн регионмудын агропромышленн комплексин предприятьмудт озлгджана. Сүл цагт сән күцәмж бәргдв, тер тоод эн жил Москва балһснд болсн цугәрәсән һәәхүлд алтн медаль шүүж авв. Институтын директор Анатолий Ариловин келсәр, иим сән үзмж институтын номтнрин коллективин шунмһа көдлмшин аш болжана.
Ода институтын ханьд һучн негн күн көдлжәнә, тер тоод арвн зурһан номин кандидат болн тавн номин доктор. Шинжлт кедг институт олн-зүсн тохма мал һарһна, буудян болн малын хотын эк бүрдәж һарһжана. Хальмгин номтнрин шинжлтс малын идг босхлһнд болн Монһлын аһуд тег көдәрлһнлә ноолдан туст олзлгджана.
Институтын әнгин һардлач Борис Гольдварг келсәр, эн жил урһмлын шин эк һарһлһна көдлмш кех зура бәәнә. Иим хойр сорт танһчин тәрәчнрт кергтә болх. Эдниг Хальмг танһчин аһуд болн Әрәсән талдан чигн регионмудт тәрж болх.
Институтын номин сегләтр Николай Цаган-Манджиевин келсәр, һазр көдәрнлә ноолда келһнә цуг көдлмш мана номтнрин шинжлтә кегджәнә. Иим шинжлт мана номтнр эврәннь һазрин аһуд кев. Ямаран культур тәрхин тускар ямаран болзгт тәрхин утскар мана номтнр шинжлт кесмн.
Танһчин малчнр ода эврәннь көдлмштән номтнрин шинжлтс болн күцәмжс олзлж көдлжәнә. Ода тохма малд тамһ тәвлһнә өдгә цагин эв-арһ сән ничлән күргжәнә, махна малын чинр ясрулһна туст шин шинжлтс олзлгджана.
Тер мет институтын номтнр геедрсн хальмгин тохма барг ноха босхж авлһан ик чинртх көдлмш күцәжәнә. Энүнә төлә Монһлас, Киргизяс болн Китдин Шинжәнәс ноха питомникд авч иргдв. Келхд, бөдүн барг ноха өндртәхн далн атвн сантиметрт күрнә, йирн килограмм татна.
Батор Адучиевин келсәр, эннь номин шинжлт болжана. Аштнь цуг көдлмш сән күцәмжтә болх зөвтә. Тиигхлә хальмг тохма барг ноха һарһж авгдх.
Өдгә цагт селәнә эдл-хаун шинжлт кедг хальмгин институт мана региона аграрн халхин көдләчнрт номин, методическ болн дамшлтын нөкед болжах ор һанцхн учрежеднь болж һарчана.
Бевина Мергн, Мятежный Максим
