Хальмгин бөкнр Универсиадт орлцх зөв авв

Хальмгин спортсменмүд бүс бәрлдәд ноолдлһна Әрәсән хамцу командын ханьд орх арһ бәәнә. Эн жил нарта-делкән Универсиадын наадн Казань балһснд болх. Воронеж балһснд шүүврин марһан болв. Энүнд һурвн зун бөк дөрлдв. Эврәннь чиннүрин категорьт хальмгин бөкнр һурвн күрл мөнгн медаль шүүж авв.

Ноолдан дөрвн минутас үлү болхш. Цугәрәсән чемпионатын орлцач Санл Андреевин келсәр, иим ахр цагин эргцд диилвр бәрхд күнд. Воронеж балһснд болсн шүүврин марһана ашар өдгә цагин гуманитарн академин оют зун килограммин чиннүрт һурвдгч орм эзлв. Тегд Санл Андреев болн Хальмгин университетин хйор бөк Очр Горяев болн Дмитрий Кутушов Әрәсән хамцу командын ханьд орх ицлтә бәәнә. Ода болхла эдниг көрнгин ханьд орулв. Келхд, Санл Андреев иим ик чинртә дөрлдәнд түрүн болж орлцжана.

Спортын мастер, бөк Санл Андреевин келсәр, иим бөк бәрлдән күүнә занг батрулна. Нег үлү, иим ик чинртә дөрлдәнд орлцхла, дамшлт хоршсан деерән, күн батрна, чанһ неквртә болна. Кедү ноолдснь бийнь, дуту-дундс ода чигн олн. Энүг чиклх кергтә болжана.

Елизавета Жигачевад болхла марһан күцлтә болсн уга. Ода эн күүкн турнирн таблицд тавдгч ормд йовна. Түрүн ноолдан хальмгин спортсменк Липецк балһсна бөкд шүүгдв. Энүнә хөөн нарта-делкән чемпионк, Татарстана элч Анастасия Проскуринад диилгдв. Энүнә хамгин дурта бөкин эв-арһ олзлж чадсн уга. Ода болхла эврәннь һарһсн дуту-дундсан шинжлжәнә. Удл уга Елизавета Москва балһснд болх цугәрәсән турнирт орлцхар белджәнә.

Спортын мастерин кандидат Елизавета Жигачеван келсәр, марһана өмн хамгин дурта эв-арһан кесг дәкж олзлж даснав. Эн саамд олзлж чадн уга. Тегәд диилгдв. Кемр эврәннь дурта эв-арһан олзлсн болхла, диилвр бәрх бәәж.

Воронеж балһснд хамгин олн бөк — һурвн зун спортсмен дииләчән йилһв. Эднәс бөк болһн диилвр бәрхәр зүткв. Бү бәрәд ноолдлһна Хальмгин федерацин вице-президент Эрнцн Авлаевин келсәр, дөрлдәнд орлцсн бөкнр нурһлж ик дамшлтта болн чидлтә спортсменмүд. Эднәс зәрмнь нарта-делкән марһаст диилвр бәрсмн эс гиж призермудын тоод орла.

Танһчин бичкдүдин школын вольн янзар болн келн-улсин бөк бәрлдлһнә тренер Эрнцн Авлаевин келсәр, марһан йир зүткәтә болв. Чиннүр болһнд чидлтә сән бөкнр цуглрв. Дөрлдәнд спортын мастермуд, нарта-делкән классин спортын мастермуд орлцв. Йир өөдән рейтингта дөрлдән болв. Тегәд мана танһчин бөкнр һурвн күрл мөнгн медаль шүүж авснь сән күцәмж болжана.

Федор Анчеев дөчн жилин туршарт бичкн көвүдт бөк бәрлддг эрдм дасхжана. Энүнә сурһульчнр марһанд орлцсн кемд оньдин үүмж зовна. Харм төрхд, мөнгн уга болад, ик чинртә дөрлдәнд орлцдг арһ уга болна. Дару-дарунь марһаст орлцад, чидлән сөрхлә, бөкнр чанһ-чиирг болна, эднә зангнь батрна. Иим дөрлдән угаһар сән күцәмж бәрж болшго гиж тренер тоолажна. Ода болхла хальмгин бөкнр Казань балһснд болх Универсиадт экләд белдвр кежәнә. Оютнрин нарта-делкән марһан эн жилин июль сард болх. Мана танһчин спортсменмүд тенд эрк биш диилвр бәрх саната.

Ээнән Ольга, Очра Сергей