Хальмгин боксермуд сән үзмж бәрв
Хальмгин боксермуд дәкнәс сән үзмж бәрв. Ростов на Дону балһснд Өмн үзгин федеральн округин чемпионат төгсв. Хальмгин уйн наста боксермуд нег алтн медаль болн һурвн күрл мөнгн медаль шүүж авв.
Баһ наста боксермуд ноолдана хөөн олн-зүсн шав чирәдән авч. Алтн медаль шүүж авсн Чингис Натыровин келсәр, марһанд харслһна буллһар махла угаһар ноолдв. Нег жил хооран любительск боксин нарта-делкән ниицәнә шиидврәр бөдүн улс дунд ноолданд боксермуд иим булһар махла олзлх зөв уга. Эн зокал күүкд улст болн баһ наста болн уйн наста категорьт дөрлджәх боксермудт тархагджахш. Чингисин тоолврар иим шиидвр авснас хөөн ноолдан улм хәләмжтә болв. Тәвн хойр килограммин чиннүрт мана боксер алтн медаль шүүж авв. Энүнә төлә зүткәтә ноолдан болв. Тренер Хонюр Брюгидиковин өгсн селвгүд сән нилчән күргв.
ЮФО-н боксин чемпион Чингис Натыровин келсәр, сүл ноолдан йир зүткәтә болв. Әәдрхн балһсна боксер чанһ-чиирг. Давсн жилд бас энүнлә ноолдсн бәәж. Тиигхд бас диилвр бәрв.
Хальмг танһчин талдан һурвн спортсмен Алексей Басханжиев, Нимя Бадаев болн Данир Унгарлинов чемпионатд бас сән күцәмж бәрж чадв. Эдн күрл мөнгн медаль шүүж авв. Алексейин келсәр, олн ачлвр шүүж авх арһ билә. Тер бийнь эннь бас сән үзмж болв. Зурһан боксерас дөрвнь медльмуд шүүж авч чадв.
ЮФО-н марһана призер Алексйе Басханжиевин келсәр, мана танһчд федерац тогтагдв. Энүг Церн Бельтриков һарджана. Эн седвәрч күүнә нилчәр Хальмг бокс делгрлт авчана. Иргчдән хальмгин боксермуд бйиән сән халхаснь үзүләд, диилвр бәрх.
Хальмг танһчин боксин федерацин президент Церн Бельтриковин темдглсәр, жил ирхвс бичкн боксермудын эрдм өөдләд йовна. Цөн өдр болад Чингис Натыров Кисловодск балһснд олимпийск комплекст сурһулин болн дамшлтын көдлмш күцәхәр һарч йовх. Хальмгин боксермуд иргчдән сән күцәмж бәрә арһ бәәнә. Танһчин толач Алексей Орлов эн спортыг сәәнәр дөннжәнә.
Иим ик чинртә марһан уйн наста боксермудт йоста сән сурһуль болна, энүнд хоршасн дамшлт иргчдән туста болх. Чингис Натыров эн жилин ноябрь сард Хабаровск балһснд болх Әрәсән чемпионадт орлцх зөв авв.
Батан Санжирма, Хавтхна Анатолий
