Хальмгин бичкн билгтнр Польшт болсн марһанд орлцв

“Зимняя сказка в Татрах” нертә бичкдүдин үүдәлтин нарта-делкән фестиваль Польшт болв. Январск фестивальд Европин болн Әрәсән бичкдүд орлцв. Бичкн артистнр олн-зүсн халхар билг-эрдмән үзүлв. Тер тоод уйн наста билгтнр бииһин, келн-улсин дууһин марһаст орлцв. Хальмг танһчин бичкдүдин үүдәлтин бәәшнгин сурһульчнр Польшт болсн фестивальд сән үзмж бәрв.

Польшас хәрж ирсн автобусиг мана үүдәгч баг болн бичкдүдин эк-эцкнрлә хамдан тосж авв. Тенд Хальмгин билгтнр бииһин номинацд нарта-делкән фестивалин хамгин өөдән мөрә — Гран-при шүүж авч. Эдн Мөнгн Байр болн Чичрдгби үзүләд, олн улсин болн жюрин зүрк авлв. Дмитрий Утнасуновин келсәр, хальмгин билгтнр йилһән, сән кевәр билг-эрдмән үзүлв. Дмитрий Утнасуновин келсәр, бичкдүд түрүн авгтан зөвәр үүмәд бәәв. Түрүләд негдгч девснгин диплом өгв, хөөнь гран-при шүүж авсна тускар зәнглв. Мана көвүд-күүкд икәр байрлв.

Келн-улсин зевсгүдин марһанд Данзн Басангов хойрдгч орм эзлв. Энүнә цоксн домбр айс олн мәтн икәр таасгдв. Һәрә Бюляев болн Әнгр Чунчуева болхла иим нарта-делкән марһанд түрүн болж орлцв. Тер бийнь эдн сән күцәмж бәрж чадв. Енгсг сәәхн дуд дуулад, цуглрсн улсин чикнә хужр ханһав. Аштнь фестивалин негдгч болн хойрдгч девснгин лауреатын нер зүүв.

Бичкдүдин үүдәлтин танһчин цутхлнгин директор Ирина Бадмаеван келсәр, Зимняя сказка в Татрах нертә марһан Польшин хамгин ке-сәәхн һазрт, цаста уулта, гилвскн нарта болн көвкр цаста һазрт болв. Энүнд бичкдүд цуг билг-эрдмән цуг халхаснь үзүлж чадв. Иим фестивалин йовудт билгтә көвүд-күүкд йилһрнә. Бичкдүдин үүдәлтин танһчин цутхлнгин директор Ирина Бадмаеван келсәр, иим марһнд орлцхла, күн икәр үүмнә. Фестивальд белдсн кемд багшнр болн бичкдүд ик көдлмш күцәв.

Фестиваляс көвүд-күүкд ик байртаһар хәрж ирв. Тенд билгтнр немр чидл болн сергмж авч, иргч марһанд белдвр кежәнә. Дарани марһаст көвүд-күүкд бас диилвр бәрх саната.

Ээнән Делгр, Хавтхна Анатолий