Хальмг танһчин түрүн Улан дегтр барлгдв
Эндр Хальмг танһчин түрүн Улан дегтрин презентац болх. Шин дегтрт олн-зүсн бамб цецгүдин болн талдан чигн өвәрц урһмлын туск материалмуд орх. Танһчд бәәршлжәх зун дөчн зурһан мал-аһруснас тәвн нәәмн олн-зүсн шовуд бәәнә. Шин дегдриг Хальмгин университетин номтнр, номин учрежденьсин көдләчнр белдж һарһв.
Хальмгин Улан дегтрт мана теегт бәәх өвәрц болн ховр мал-аһрусн болн урһмл орв. Региональн Улан дегтр белдлһнә көдлмшч багин һардач, биологин номин кандидат Валентин Музаевин келсәр, иим дегтр барлх санан ик кезәнәс авн орсмн. Зуг мөнгн уга болад энүг барлдг арһ уга болв. Ода теегин мал-аһрусна болн урһмлын бәәдл шинжләд авгдсн хөөн, мана танһчин аһуд бәәх өвәрц болн ховр шовудын, урһмлын болн талдан чигн аһрусна бәәдл ил үзгджәнә. Арвн жилдән кегдсн экспедицин йовудт мана теегин аһуд түрүн болж теегин пустельга шовун олдв.
Түрүн хәләцд бичкн начн шовуна өнгтә. Харм төрхд ховр болн өвәрц дрофа шовуна то дегд бичкн, иим шовудын то ода хойр —дөрвнд әрә гиж күрчәнә. Тер мет Хальмгт ода филин, гөрвлжн баһар харһдг болв. Биолог гомин кандидат Валентин Музаевин келсәр, Улан дегтрт бичкн меклә орулж селвг өгч. Эн бичкн меклә утдан һурвн-дөрвн сантиметрт күрнә. Болв эн меклә Европд хамгин хорта меклә болжана.
Шин дегрт белдж һарсн улс дунд танһчин йиртмжин көрнг болн эргндк аһу харлһна министерствин әнгин ахлач Владимир Бадмаев йовна. Энүнә келсәр, Улан Дегтрт зерлг шовудын тускар олн халх бичгдв. Эднә зургуд бәәнә, иим шовуд бәәршлдг һазр темдглгдв. Ода теегин һәрд шовун бас ховр болжана. Давсн зун жилин найдгч жилмүдт эднә то тавн-арвн минһн күрчәсн болхла, ода зуг долан зун иим шовун үлдв.
Владимир Бадмаевин келсәр, ода цуг Әрәсәд шовудын то баһржана. Ода Хальмг танһчд теегин юәрд харсж авх төр тәвгджәнә. Теегин талдан зүсн һәрд моднд үүрән ясна. Ода теегт модн баһ. Тегәд эднә то бас баһржана.
Зоолог Ольга Букреева мал-аһрусна тускар шинжлтән кев. Энүнә олж авсн авсн элснә зурмн йир өвәрц болв. Энүг Үстин района Ижлын зүн көвәд олж авч. Улан Дегтрт иим аһрусна нәәмн зүсн орв. Тер мет ялмн, хомяк болн теегин пеструшка бас ховр болж одв. Энүнә тоолврар, иим мал-аһрусн удл уга тас уга болж одх әәмшгтә. Энүнә учрнь олн. Тер тоод йиртмжин бәәдл сольгдв, әмтн бас ик хорлтан күргжәнә. Тегәд мана теегт бәәх цуг мал-аһрусиг харж харсх төр тәвгджәнә.
Зоолог Ольга Букрееван келсәр, тенгрин бәәдл солльгдснас иштә урһмл бас баһржана. Ода тәвдгч-жирдгч жилмүдлә әдл биш, хур-чиигтә болжана. Ода урһмлын бәәдл тас талдан. Зурмнд иим урһмл тааста болжахш. Тегәд зурмна то баһрв. Энүнәс көлтә талдан чигн мал-аһрусна то бас баһржана.
Улан дегтр номтнрт болн специалистнрт кергтә болх. Тер мет эврәннь төрскн һазртан дурта цуг улст соньн болх зөвтә. Дегтр белдсн номтнрин тоолврар, кемр бидн Хальмг теегт бәәх мал-аһрус бол урһмлыг эс харсж авхла, эдн зуг музейин экспонат болж үлдх. Тегәд Улан дегтрин һол күцлнь — мана региона цуг улс өвәрц мал-аһурс болн урһмл харсж авлһан төрт он оньг өгхинь некжәнә.
Ээнән Ольга, Хавтхна Анатолий, Очра Сергей
