Хальмг танһчин бәәцин коммунальн эдл-ахун болн энергетикин министр Нелли Ткачева көдлмшин халхар районд одв
Дигтә эн өдрмүдт коммунальн эдл-ахун болн энергетикин министр Нелли Ткачева Октябрьск районд көдлмшин халхар одад района һардврла харһад олн зүсн хурц төрмүдәр өргн күүндвр тогтасн билә. Күүндврин йовудт района һардвр Ик Царн селәнд тосхгджах шин больницын болн ус оруллһна көдлмшин тускар тодрхаһар келж өгв.
Октябрьск района ик царн селәнд ус орулһна тосхлтын көдлмш төгсдән өөрдж йовна. Хальмг танһчин бәәцин-коммунальн эдл-ахун болн энергетикин министр Нелли Ткачева эн көдлмшиг эврә нүдәрн хәләж чадв. Эн өдрмүдт сүл көдлмш үлдв, һазр дор көдләчнр усна суврлжс татад гер болһнд орулжана. Өдгә цагт усар ик царн селәнә болн өөр бәәх селәдмүдин әмтн усар теткгдхмн гиж тосхлтын фирмин директор Олег Акугинов келж өгв.
Энүнә келсәр хамгин түрүнд социальн обектмүд, бичкдүдин сад, школ болн больницд ус угаһар үлдшго. Өдр сө уга көдләчнр эн обектмүдт көдлжәнә. Селәнә уульнцмудын дунд усна суврлжсин кесг километр татгдсн бәәнә.
Ик Царн селәнд тосхгджах ик больниц танһчин цуг селәд поселкин больницас йилһрнә. Энүнд өдгә цагин некрлә ирлцжәх оборудовань углж тәвгдх. Эн больницын тосхлт федеральн программин мөнгәр болн района эмчнрин проектар тосхгджана. Хальмг танһчин бәәцин-коммунальн эдл-ахун болн энергетикин министр Нелли Ткачеван келсәр йилһгд өггдсн мөнгн күртчәнә.
Нелли Ткачеван келсәр эн жилин зура күцәгджәнә, ирх жилд бас кесг зура бәәнә. Тиим харһлтс цааранднь бүрдәгдх. Тер юнгад гихлә района арһлачнр нанла хамдан күүндәд олн зүсн төрмүд дор ормдан хаһлж чаджана.
Көдлмшин халхар ирсн Хальмг танһчин Бәәцин —коммунальн эдл-ахун болн энергетикин министр Нелли Ткачева дәкәд тосхачнрла болн финансистнрлә харһж күүндв.
Октябрьск района РМО ахлач Санал Адьяевин келсәр эн жилд мана өмн тәвгдсн зураһан бидн дуусвидн. Ирх жилд бидн көк түләнә тускар күүндх санатавидн. Министрлә болсн харһлт олн улст таасгдв гиж района ахлач маднд келж өгв.
Района ахлачнр болн правительсвин министрмуд район болһнд көдлмшин халхар дангин йовхла эдн хоорндан күүндәд дор ормдан кесг төрм хаһлдж чаджана гиж селәнә бәәрн әмтн ухан тоолврарн хувалцжана.
Бевина Мергн, Ирчин Алексей
