Хальмг танһчар бәәх федеральн миграционн церглтин әнгд секәтә үүднә өдр болв
Нарт-делкән мигрантнрин өдр темдглгдв. Минһн йисн зун йирдгч жилин декабрин арвн нәәмнд ООН-на Генеральн ассамблей күч-көлсч мигрантнрин болн эднә өрк-бүлмүдин зөв-йос харсгч нарт-делкән конвент батлсн болдг. Нарт-делкән эн өдрлә ирлцүлж Хальмг танһчар бәәх федеральн миграционн церглтин әнгд секәтә үүднә өдр болв. Әрәсән иргн болх эс гиж Әрәсәд күч-көлснә халхар үүлдх улс эрк биш орс келнә шүүвр өгх зөвтә.
Тавн жил хооран Душанбе балһснас ирсн Амир Алимов мана Хальмг танһчд өрк-бүлән тогтаһад, сән көдлмш олсн бәәнә. Цуг элгн-саднь Таджикистанд үлдсмн. жилд нег дәкч тедндән зовлһж одна. Таджикистана иргн Амреддин иргчдән Әрәсән иргн болад, энд бәәршлх седклтә. Энд нанд таасгдна — тогтун бәәдл, әмтн цуһар цаһан седклтә гиж эн күн келнә.
Әрәсән медлд цаг зуур бәәх талдан орн-нутгудин иргнмүд мана танһчар бәәх федеральн церглтд олн зүсн төрмүдәр ирнә. Нурһлж эднә икнкнь күч-көлснә үүлдвр күцәх цаас белдәд орулж өгнә, Энүнә хөөн Әрәсән медлд көдлх зөв авцхана.
Әрәсән миграционн церглтин Хальмг танһчар үүлджәх церглтин күч-көлснә төрәр бәәх әнгин ахлач Эрдни Авшеевин келсәр, жил болһн мана танһчд талдан орн-нутгудас тавн минһ һар әмтн ирдг болжана. Эднә икнкнь цаг зуур бәәһәд, көдлмш кежәһәд йовж ода. Тегәд эднәс хойр минһ шахунь үлдж көдлдг болжана.
Эн өдр цергллтд ирсн эмтнд специалистнр миграционн кергт орулгдсн шин зөв-йосна тускар келж өгв. Эн жилин декабрь сарин нег шинәс авн сольвр орулгдсн бәәнә. Әрәсәд көдлмш күцәх талын келн —әмтн эрк биш орс келнә шүүвр өгх зөвтә. Энүнә туска закана проект Әрәсән деед хүүвин депутатнр батлсн бәәнә.
Мана танһчд иим улст орс кел дасх арһ Хальмг деед сурһуль өгчәнә. Деед сурһулин ул деер үүлджәх довузовск факультетд талын келн-әмтнә төлә олн-зүсн курс давулгдна. Эндр өдр эн факультетд жирн тавн күн орс кел дасчана.
Мана факультетд курс авд һарс улс ямр нег деед сурһулилин медлд шүүврән өгч сертификат авч чадхмн. Тиим цутхлнг Хальмг танһчас холл биш бәәх Ахш балһснд бәәнә , бидн болхла зур орс келнә курс давулнавидн гиж Хальмг деед суруһлин эн факультетн декан Любовь Староверкина келнә.
Хальмг деед сурһулин ул деер давулгддг курс орх улс эврә мөнгән өгәд орх зөвтә. Өдгә цагин бәәдләр эннь дала мөнгн биш, болв холл орн-нутгудас ирсн улст эннь бас баһ биш, юнгад гихлә эдн гертәсн холд күүнә һазрт бәәх улс болжана. Эднд биистнь дөнг кергтә , сән көдлмш хәәһәд, сән жирһл хәәһәд эдн ирсмн.
Бевина Мергн, Котина Валерий
