Хальмг кел хадһлһна төрәр селвлцән болв

“За перемены” нертә танһчин керг-үүлдврин программар төгрг ширән сүүр болв. Энүнд олн-зүсн эрдмин элчнр орлцад, төрскн кел болн сойл яһж хадһлхин тускар ухан-тоолврарн хувалцв. Төрскн кел яһж хадһлхин тускар баһчудын жисәнә элчнр эврәннь селвгүдән орулж өгв.

Төгрг ширән сүүрт номтнр, бичәчнр, олна үүлдәчнр болн йосна элчнр орлцв. Эдн цугтан олн-зүсн наста, олн үйнрин элчнр болжана. Хальмг кел яһж хадһлхин туск төрәр күүндвр кехәр эдн цуглрв. Төрскн келәр әмтн һаза, школд, өрк-бүлдән күүндхин туск төриг яһж хаһлхин тускар ухан-тоолвран хувалцв. региональн йосн эн туст цуг кергтә керг-үүлдврмүд күцәжәнә. Үлгүрнь, государственн келнә туск закан батлжа вгдла, бүкл программ үүлджәнә, танһчин толһачин медлд олна хүүв тогтагдв. Эн халхар бәәдл ясржана.

Школмудт болн бичкдүдин садмудт хальмг кел даслһна төлә шин учебникүд олзлж шин эв-арһ оурлгджана. Тер мет шунмһа баһчуд бас эн төрт орлцжана. Төгрг ширәд иим көвүд-күүкд олра ирж орлцв. Иткл нертә олна организацин һардач Виталий Боков эднә кеж-күцәх көдлмшин тускар келж өгв. Энүнә келсәр, элстихн болн гиичнр иим керг-үүлдврмүдт дурлж орлцна. Тер тоод баһчуд Элст балһсна цутхлнг талвнгд концертмуд бүрдәнә, Элстин цутхлнг хурлд Хальмгар келтн нертә сурһуль күцәжәнә.

Эрдм-сурһулин көдләчнрин профсоюзин рескомин ахлач Антонина Коокуеван тоолврар, өрк-бүлд уул авьяс-зангшал тогтах кергтә. Эн туст Коокуева Виталий Боковла зөвшәржәнә. Эврәннь келн-улстан, уул авяьстан болн төрскн келнәд дурта күн уул сойл цецгәрлтин төлә чидлән әрвлшго.

Антонина Коокуеван келсәр, шунмһа баһчуд дала үлү үгмүд келлго, хальмг би бииләд, олн улсиг энүнд орулад, хальмг келәр келәд, ик көдлмш кежәнә. Эннь седклд байр үүдәнә. Буудиийск сойл шингәж авчана. Эннь ик нәәлвр өгчәнә.

Төгрг ширән сүүрт Бурятас ирсн баһ наста номт бас орлцв. Жирһл Бадагаров буряд келнә электронн учебникла сүүрин орлцачнриг таньлдулв. Иим төсвиг ода хальмгин номтнр бас күцәжәнә.

Хальмгин университетин багш Светлана Трофимован келсәр, хальмг келнә багшнр ик дамшлт хоршав. Эднә дамшлтыг хураж авад, олзлх кергтә. Эднә зәрминь сурһулин учебникд орулх кергтә. Эн электронн дегтр Хальмг келн гиж нерәдгднә.

Төгрг ширән сүүриг Хальмг танһчин эрдм-сурһулин министрин дарук Раиса Дякиева дигләд, иигж келв. Дякиеван келсәр, төгрг ширхн сүүрт орулж өгсн селвгүд эрдм-сурһулин министерствин зурад орулгдхмн.

Чучян Валентина, Котина Валерий