Хаалһар йовлһна зокалд сольвр орулгдв
Автошколд сурһуль дассна хөөн маши залдг зөвин цаас авх шүүвр өгч болх. Урднь эврән белдвр кеһәд иим шүүвр өгч болдг билә. Энүнә тускар хаалһар әәмшг угаһар йовлһна заканд сольвр орулгдв. Ноябрин тавнас авн сольвр үүлдвр оржана.
Ода шин закаһар маши залдг зөвин цаасиг сольх керг уга. Зуг эн документын үүлдврин болзгнь төгсхлә, энүг сольж болх гиж ГИБДД-н көдләчнр цәәлһвр кев. Ода деерән иим цаас өглһнә зокал урдк кевәрн үлдв. Ода үүлджәх категорьмудла подкатегорь орулгджана. Ода Әрәсән жолачнрин цааснд “А1”, “В1”, “С1”, “Д1” темдгүд бичгдх.
ГИБДД-н ах инспектор Андрей Василенко келсәр, “В” болн “С” категорьта жолачнр нааран ирәд ирлцнһү подкатегорь авч чадх. Автобусмудын жолачнр цаасан сольж чаджана. Энүнд зуг хөрн нег нас күрсн жолачнр иим зөв авхмн.
Ода мопед эс гиж скутер залхин төлә жолачин иткүлин “М” нертә шин категорьта документ һарһж авх кергтә. Энүг арвн зурһан нас күрсн әмтнд өгх. Урдн иим көлгн-күчиг жолачин цаасн угаһар залж болдг бәәсмн. Шин закаһар шүүвр өглһнә зокалд бас сольвр орулгджана. Ода шүүврт эврән белдж болшго. Эрк биш жолач болһн автошколд сурһуль дасх зөвтә.
Автомобилистнрин ниицәнә ахлач Алексей Ванькаевин келсәр, Ода автошколмуд шин подкатегорь өгх зөвшәл авх зөвтә. Энүнә төлә шин программ кергтә. Ода деерән иим программ ирәд уга. Танһчин эрдм-сурһулин министерствд цаас орулж өгх кергтә.
Тер мет шин закаһар ода жолачнр автоматическ эв-арһта машиһар маши залж чадх. Иим жолачнрин документд ирлцнһү АТ темдг бичгдхмн. Иргчдән эдн механическ эв-арһта маши залхар седхлә, эдн дамшлтын шүүвр өгх зөвтә. Элстин автошколын сурһульч Виталий Муравейников шин закана тускар зуг ода медж авч. Энүнә тоолврар, иим нарта-делкән дамшлт хаалһд зеткртә йовдлмудын то баһрулһнд сән нилчән күргх.
Виталий Муравейниковин келсәр, механическ эв-арһта маши залх сурһуль дасхд сән болна. Нег сардан маши залдг дасж авч.
Һазадын ордудын жолачнр болхла эрк биш Әрәсән жолачин цаас авх зөвтә. Эн туст шин закан өрәл жил болад үүлдврт орулгдх. Шин заканд орулсн сольвр ноябрин тавнас авн орулгдх зөвтә. Болв энүнә ик зунь иргч хойр минһн арвн дөрвдгч жиләс авн үүлдврт орх. Энүнә төлә шүүвр авлһна зокал батлж авгдх зөвтә, жолачин шин документ ирх зөвтә.
Ээнән Ольга, Котина Валерий
