Грозный балһснд нарта-делкән фестиваль болжана
Эндр Грозный балһснд Традиции гор нерәдлһтә сойлын болн туристическ форумин орлцачнр сүл белдврән төгсәв. Асхлад энд фестивалин һол программ болн нарта-делкән гала-концерт эклх. Энүнд дөрвн зун артист орлцх, тер тоод Өөрднр нертә государственн бииһин театр билг-эрдмән үзүлх. Тенд мана үүдәгч баг көдлжәнә.
Фестивалин орлцачнр Грозный балһснла таньлдх цаг уга болв. Эдн зуг репетицд одхларн хаалһдан балһс зүж чадв. Чеченск республикин хотл балһсн гиичнрин бүркг хур чигтә өдрәр тосв. Тер бийнь шинәс тосхгдсн балһсн ке-сәәхнәрн олн улсиг байрлулв. Уульнцс цевр, сәәхн. Грозный балһснд һаза тәмк татсн улс үзгдхш. Тер мет әрк-чаһр хулджах магазид болн зар бас үзгдсн уга. Гиичнр репетицд темдглсн цагт ирв. Эдн эврәннь балһсан, танһчан болн эврәннь регионан элчлжәнә.
Традиции гор нертә нарта-делкән сойлын туристическ негдгч фестивалин һол күцлнь — Кавказин ке-сәәхн һазрт туристнрин оньг тусхалһн болжана. Энд өвәрц туристическ соньбн һазр бәәнә, әмтн амрдг бәәрн сән таалта. Энүнд гиичнрт таасгдх зөвтә. Тегәд чигн форумин бүрдәһәчнр көгжмәр болн бииһәр дамжулад Кавказин һазрла олн улсин таньлдулх зурата.
Чечнян сойлын министерствин олн-әмтнә үүдәлтин цутхлнгин специалист Мадина Товгерееван келсәр, Чеченск республикд бүрдәгджәх иим керг-үүлдврмүдин һол күцлнь — цуг келн-улсиг өөрдүләд негдүлһн болжана. Сойлын келәр, көгжмәр, бииһәр дамжулад олн кенл-улсиг негдүлх кергтә.
Форумд Украина, Азербайджана, Дагестана, Волгоградын, Әәдрхнә, Хальмг танһчин, Ставрополин болн талдан чигн регионмудын элчнр орлцжана. Фестивалин ах режиссер чанһ неквртәһәр репетиц давулжана. Форумин һол күцлиг — олн-әмтнә бииһин ке-сәәхнинь йилһән сәәнәр үзүлх төриг хаһлхар шунжана. Әрәсән олн-зүсн республиксин, облатьмудын, краймудын болн орн-нутгин биичнр нег-негән сәәнәр медәд, олн-әмтнә би дасж авад, талдан биичнриг дахад биилжәнә. Эднә түрүн хәләһәчнрнь фестивалин орлцачнр. Концертн залын үүднә өөр эдн ухан-тоолврарн хувалцжана. Үлгүрнь, Хальмгин өөрднр тетарин тускар эдн нег мөслгч тоолвр уга.
Әәдрхн балһсна “Тулпар” ансамблин орлцачин эк Гульнара Ахмедован келсәр, хальмгин ансамблин би йир ке-сәәхн болн өвәрц. Энүг хәләсн улсиг икәр байрлх гиж санжана.
Ставрополь балһсна “Слобода” ансамблин орлцач Светлана Штепина келсәр, хальмг уул би үзхлә сән болх билә. Олн әмтн биилдг би сонбн болх бәәсмн.
Артистнр нег-негән соляд ик концертд белдвр кежәнә. Болв фестивалин орлцачнр муурасн медүлжәхш. Асхн болх ик концертд цуг артистнр сән тохнятат белдвр кеһәд, эврәннь келн-улсин билг-эрдмиг нааран ирст улст күргж медүлх зөвтә.
Хавтхна Элла, Очра Сергей
