Грипп гемәс саглулһна тәрлһн кегджәнә

Хальмг танһчд грипп гемәс гетлүлһнә төлә әмтнд кех тәрлһнә эм ирв. Специалистнрин келсәр, ода деерән олн улс царцад гемтжәнә. Тер саамд хотл балһсна поликлиникд тәрлһнә кем эклчкв.

Намр ирчкв. Һаза дару-дарунь хур орад зөвәр серүтв. Иим кемд әмтн царцад гемтнә гиж Элст балһсна бәәрн күүкд күн Евгения Горяева келнә. Тегәд эмчин хәләврт орсн хөөн, грипп гемәс саглулһна тәрлһн орх селвг эмч өгв. Тегәд чигн эндр хотл балһсна поликлиникд талдан улсла хамдан ирәд, тәрлһ авх саната.

Евгений Горяеван келсәр, жил болһн өрк-бүләрн иим тәрлһнд орна. Тәрлһиг амрар даана. Тегәд чигн мана өрк-бүл грипп гемәр гемтхш.

Эмч инфекционистын келсәр, хамгин түрүнд тәрлһнд медәтә ул эрүл-менд харлһна халхин, эрдм-сурһулин, хулд-гүүлгәнә болн коммунальн эдл-ахун көдләчнр оржана. Эндр өдрт тәрлһнд орх улсин то хөрн минһнд күрв. Иим тәрлһнд орхла күн грипп гемәр гемтсн бийнь, гемин хөөн үлдл зовахш. Тәрлһ эс авсн улс болхла грипп гемиг күндәр даана. Специалистнрин темдглсәр, грипп гем тархагдсн цагт иим тәрлһ кех керг уга болна.

Хотл балһсна поликлиникин эмч инфекционист Райза Санджиеван келсәр, иим тәрлһ сезона эклцәр кехлә сән болна. Тәрлһнә хөөн иммунитет бүкл арвн хойр сардан тогтна. Тәрлһ кесн хөөн хойр долан хонг болад иммунитет экләд тогтна. Бүкл жилдән санамр бәәж болх.

Ода тәрлһ кехин төлә “Гриппол” эм хулдж авгдв. Иим тәрлһнд орсн әмтн грипп гемәр гемтсн бийнь, гиигн кеәвр гемтнә. Эн жил Элст балһсна поликлиникд хөрн тавн минһн һурвн зун хөрн һурвн эм ирв. Иим тәрлһиг грипп гем тархахин өмн һурвн сар өмн кехлә сән болна. Эмч Анатолий Сотниковин келсәр, минь ода иим тәрлһ авхла олз-туста болх.

Элст балһсна поликлиникин эмч Анатолий Сотниковин келсәр, иим эм грипп гемәс сәәнәр харсна. “Грипполин” ханьд цуг кергтә эм орна.

Грипп гем тархаглдхин өмн хойр минһн арвн һурвдгч жилд ут-тоодан келн-улсин литәр зун арн долан минһн күүнд гетлүлгч тәрлһ кех зура бәәнә.

Ээнән Делгр, Максим Мятежный