Эндр Хальмг танһчин толһач Алексей Орлов журналистнрла пресс-конференц кев
Эндр Элст балһснд правительствин герт Хальмг танһчин толһач Алексей Орлов журналистнрла пресс-конференц кев. Келхд, иим күүндвриг танһчин һардач жил болһн кенә. Эн жил һурвдгч конференц болв. Энүнд давжах жилин аш диглгднә. Пресс-конференцд танһчин олнд зәнглһнә цуг эв-арһсин элчнр орлцв. Тер мет энүнд федеральн журналитснр бас орлцв. Хамгин түрүн болж Хальмг танһчин правительствин ханьд орх улсин туск сурврт Орлов хәрү өгв. Энүнә зәнглсәр, хуучн министрмүдин кабинетас дөчн процентнь шин правительствд орх. Тер тоод эрдм-сурһулин министр Лариса Васильева, селәнә эдл-ахун министр Петр Ланцанов, эрүл-менд харлһна министр Владимир Шовунов, финансин министр Надежда Глушкина болн жилишн-коммунальн эдл-ахун министр Нелли Ткачева эдн цаарандан көдлх. Министрмүдин кабинетин талдан гешүд удл уга шиидгдхмн. Тер мет пресс-конференцин йовудт Хальмгин социальн-экономическ делгрлтин эн жилин ашин болн иргч зуран тускар олн сурврмуд өггдв.
